無交嗌 炒反彈
2018年05月09日
中美貿易談判無成果亦無破裂，國務院副總理劉鶴下周又會再去美國，反映雙方繼續尋求達成協議，相信短期內應該唔會有太多新消息。美股喺工業、石油及科技股帶動下造好，港股借勢反彈，重返三萬關。
近日不同板塊炒個別，零售股表現唔錯，喺升市中唔少創咗一年
高位。內房股係另一個短炒目標，多間內房昨日派發今年首四個月銷售數據，當中碧桂園(2007) 首四個月銷售金額2575億元人民幣，按年增26.1%；合同銷售面積2739萬平方米，按年增21.4%，跑贏內地主要房企。融創中國(1918) 則是按年升幅最多，期內合約銷售金額1111億元，按年升74%。期內合約銷售面積663萬平方米，每平方米均價為1.68萬元，按年增16.7%，銷售額達全年目標4500億元的24.7%。
瑞建細細粒炒有搞作
近年業績不振的瑞安建業(983) 午後飆升，一度揚21%，見2.04元逾三個月高，收升16%，似乎有消息醞釀。瑞安系由上海姑爺羅康瑞擁有，名下有兩間公司，旗艦係瑞安房地產(272) ，另一隻係瑞建。瑞建主要係做建築及承建、水泥製造等業務。去年市場曾傳出旗艦瑞房考慮私有化，股價一度急升，其後計劃無落實，股價顯著回落。瑞房私有化據說係有投資銀行想搵生意，故此向羅公子提出，但後來大股東諗完無做。有分析指瑞房要私有化，大股東要向銀行融資去買，但當時中央大力壓抑樓價，新盤開售唔可以超過某個水平，搞到賣高檔樓的瑞房都要度橋，喺咁嘅環境下，羅公子覺得多一事不如少一事啦。
至於瑞安建業規模同瑞房無得比，去年集團虧損6.13億元，連續兩年大蝕。針對呢個情況，董事會安排咗瑞安資深成員黃月良出任行政總裁兼財務總監，執番個爛攤子，睇番瑞安建業市值急升後仍然不足10億元，市場忽然炒作佢，相信係睇中佢市值唔大，加上業務虧損後整頓完成。既然有投資銀行搵過羅公子，上次做唔成生意，跟住可能會有啲動作搞吓。
下個月A股就會入摩，內地股市喺3000點邊緣有支持，昨日繼續高開高走，上證指數收報3161點，升24點，深成指數報10707點，上漲81點。恒指高開129點後一直向上發展，午後衝上全日高位30444點，收造30402點，升408點；國企指數收報12144點，上揚178點，成交金額1031億元。
跌得多的板塊都有反彈，蘋果連續兩個交易日創新高，令本港科技股強力回升，騰訊(700) 收升2.8%，報390.6元，貢獻恒指74點；舜宇光學(2382) 收升5%，報141.2元；瑞聲科技(2018) 收升4%，報117.7元。
小米未上市先調低估值
科技半新股個別大幅反彈，閱文(772) 急彈8.7%，收報66.1元，相信係跟住阿媽騰訊造好。科技股呢排受壓，搞到首隻同股不同權上市的公司小米集團，傳出估值下調消息。上周已向港交所(388) 提交申請上市的小米，被《華爾街日報》爆佢在IPO中目標估值700億至800億美元(約5460億至6240億港元)，相比早前傳出目標估值1000億美元(約7800億港元)有所下調。根據初步上市文件，小米去年收入突破1000億元人民幣，達1146億元，按年增加67%。去年撇除特殊項目後，經調整利潤達53.62億元，按年增1.83倍。
作為首隻同股不同權的公司掛牌，若論市值應該好快可以成為成份股，有人走去問恒指服務公司點睇，答案似乎係無問題，但同時要睇基金經理意見。目前太古有A、B股，A股係成份股，B股就無納入。小米有同股不同權，理論上唔應該影響佢入成份股地方，最多就係流通量大的公眾持股納入，流通量小的大股東股份不納入，不過，從有呢個疑問睇嚟，同股不同權喺估值而言，點都係一個扣分而唔係加價因素。
陸羽仁
金融High Tea 舊文
來源 source: http://hdfin.stheadline.com