收市閒情：黃牛vs土地大辯論
■五月天演唱會，最勁試過炒高12倍，點知開場前夕，黃牛價插水，最平57折有售！
大家撲黃子華飛，撲到黃子華都眼火爆，於是林鄭突然就話研究炒黃牛飛刑事化，幾咁體恤民間疾苦，幾咁憂國憂民。喂，咁樓市呢？
即係咁，講到炒黃牛飛問題，如果主辦單位決心要解決嘅，冇
話解決唔到。最近五月天演唱會，最勁試過炒高12倍，你點估到，開場前夕，黃牛價插水快過平收西醫生（平安好醫生：1833），最平57折有售！
市場價格由供求決定。話說今次演唱會主辦單位，開騷前個幾星期，突然皇恩浩蕩式加位派貨，一加就加一萬個。迪迪尼個場容納2萬人，開6場即係12萬個位，即係市場比原先街貨多咗9%！用股票去講，即係大股東貨源歸邊，然後由班細莊炒高，炒高價大股東散貨，價唔冧就奇；用樓市去講，簡單啲，董建華宣佈「八萬五」，樓市大冧，講完。
我唔知到底主辦單位係因為散唔曬貨，之後先加位；定咁有謀略，預先hold起飛，等你班黃牛買齊啦，就出絕招「八萬五」屠牛（理論上冇咁醒）？黃牛都可靠供應解決，咁香港樓價咁高，政府係咪真係有心解決供應問題先？
唔講咩搵地起樓，講樓花。上年首4個月，政府批出逾7,800夥樓花供應，今年頭4個月僅批出逾3,200夥，大減近六成，現時滾存待批的樓花1.48萬夥，創20個月高。港府話研空置稅，又成日話未來住宅單位落成會有幾多萬幾多萬……最弊你樓花審批都好慢，市場新供應順理成章拖慢推出。我係發展商，見街貨唔多，「傻㗎，點會唔劏你？」
開新土地，係遠水，救不了近火；至於樓花呢個近水樓台呢，又唔見得政府有做推動角色喎，點解？
香港樓長期咁貴，土生土長香港人住唔起，咁點呀？「唔怕！大家以後都係大灣區人，何不搬去大灣區其他城市呢，抵好多耶？」
千頌C
http://fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.finance.appledaily.com