公司生仔興奮不再
2018年05月03日
美國財長訪華和聯儲局議息前夕，市場繼續觀望，港股喺五一假期前大升，復市後略為調整。
美國議息重點唔係加唔加息，而係聯儲局對息口睇法係點。上任儲局主席耶倫鴿味濃，雖然佢任內股市係咁上升，最終都係無得留低。接任的鮑威爾俾人感覺較為中性，甚至有啲
人覺得佢有小小鷹風，所以喺佢主持會議下，聯儲局對息口取態，市場就較為觀望。過去兩位主席都比較着重增長，在財金政策上傾向寬鬆。時移世易，美國經濟O依家已經係史上最長增長期，對央行而言，如何能夠控制通脹，同時增加聯儲局應對日後衰退能力，開始擺上議程。O依家正路睇法，係美國五月唔加息，六月就較大機會加息。若然六月按兵不動，咁市場就會覺得係一個寬鬆訊號。
俄鋁跟住消息再炒上
至於美國財長訪華傾貿易談判，由於美國之前將戰線燒到高科技產品，將問題燒到較核心矛盾，所以美國代表成行前，放風叫大家期望唔好咁高，中國都有消息，話唔會對美國兩大要求，即係每年降低1000億美元貿赤，同喺保護知識產權上有重大讓步。中美雙方都做期望管理，加上美國距離大選仲有幾個月時間，相信唔急於解決，所以市場整體都唔寄厚望。瑞銀就發表報告，指內地經濟下半年面對較多挑戰，由於房地產及基建活動轉弱，加上考慮到中美貿易摩擦有機會升溫，談判時間可能較長，估計全年經濟增長將由去年的6.9%放緩至6.6%。該行亦預期，中央開始微調宏觀政策，以應對外圍不明朗，今年存款準備金率最多會再下調兩個百分點，但去槓桿仍會是政策基調。
當然美國總統特朗普係神經刀，佢喺談判過程中點出招無人估到。睇O依家情況，總統勇於出刀，國家機器就會配合，專業官僚就瞄準自己想做的目標出擊，咁樣既可以滿足老闆要求，又可以配合本身政策路線。好似美國話要制裁俄羅斯，財政部就擺咗俄鋁(486) 大股東歐柏嘉上枱，跟住又開出條件，要求歐柏嘉賣股，以換取美國對公司鬆綁。財長姆欽日前接受外電訪問時仲重申，美國制裁俄鋁不是要公司停業，財政部所針對的是控制俄鋁的大股東歐柏嘉，佢必須將持股比例減至50%以下。俄鋁母公司En+集團其後宣佈，歐柏嘉原則上同意離開董事會，並將持股比例減至50%以下，喺消息刺激下，俄鋁股價繼續彈升，收報2.23元，再升8.3%。俄鋁本身基本因素無乜問題，股價大插純粹係因為美國制裁，估計未來股價會跟住歐柏嘉同美國政府講數結果波動。
好似俄鋁呢啲受政治事件影響急插股份，有膽有錢者可能會喜歡博吓大霧，有中環茶友就話，就算想撈底買佢，都被美國佬搞到繑口夾杉手。茶友喺佢大跌後曾經想過兜底，銀行雖然唔係美資，但一樣唔敢沾手，講明喺指定限期前只能沽不能買，到咗指定限期後就買賣都不能做。茶友若然要做，就要另外搵間經紀行開戶，佢話博反彈都唔係實賺，結果就無行動。其實，俄鋁跌成咁都係因為美國佬禁令好辣，好多人被迫沽貨，先至會插到咁殘，茶友有錢都唔想彎腰執，咁就要等下一轉機會喇。
好醫生未掛牌 平保先回吐
俄鋁昨日咁升算係例外，大市整體觀望氣氛其實幾濃厚，港股低開後跌幅收窄，恒指收造30723點，跌84點；國企指數收報12193點，下滑137點，成交1043億元。澳門四月賭收按年升27.6%至257.3億澳門元勝預期，金沙中國(1928) 升2.7%，收報47元；銀河娛樂(027) 升2.2%，收造70.95元。多數大股都反彈，騰訊(700) 逆市升0.61%，收報393.4元；舜宇光學(2382) 逆市上揚4.92%，收報136.5元；港交所(388) 漲0.78%，收造259.2元；吉利汽車(175) 逆市急升3.1%，收報21.65元；唯獨成功分拆的平保(2318) 仲繼續跌，收挫1.1%，報76.7元。
呢排內地公司分拆成風。至此百度成為繼阿里、京東和唯品會後，百度近日發佈的2018年首季財報中透露，要剝離公司旗下金融服務業務多數股份，分拆後的新公司將啟用全新品牌「度小滿」，實現獨立運營，成為又一間分拆金融板塊並獨立融資的互聯網公司。據百度財報提到，截至2018年3月31日，百度金融服務業務總資產470億元，總負債412億元，將被重新分類為合併資產負債表中的「持有待售資產」和「負債」。度小滿金融分拆後首輪融資額超過19億美元，由TPG、凱雷投資集團領投，泰康集團、農銀國際等跟投。由於分拆新業務消息不斷，估計市場對公司「生仔」呢類消息同分拆後股份興奮度會不斷下降，形成超購唔錯的好醫生未掛牌，平保已經回吐咗幾日。
陸羽仁
金融High Tea 舊文
來源 source: http://hdfin.stheadline.com