蘋果擺明食老本
2018年05月04日
美國議息無動作，聯儲局會後聲明令人相信美國會維持加息步伐，估計下個月加息機會超過九成。雖然蘋果業績比預期好，但杜指收市仍跌174點，港股跌410點，跌幅又比美股誇張啲。
全球投資市場今年相當動盪，當中美國係起事源頭，相對下美元美股已經最無受影
響，當佢哋下跌，中港股市好大機會雙倍奉還。
科技龍頭有中年發胖
蘋果公佈今年三月底止業績，每股收益2.73美元，比市場預期2.67美元高。第二季收益為611億美元，比市場預期的609億美元高出近兩億美元。另外第二季iPhone銷量為5220萬部，略低於市場預期的5254萬部。公司同時宣佈，將增加1000億美元用作回購股票，本季季息為每股0.73美元，較前次分紅增長約16%。宣佈後蘋果股價一度上漲約5%，收市報169.1美元，比周一升3.84美元或2.3%。
市場早前因為蘋果供應商話出貨量可能比預期少，令蘋果和相關公司股價大插。陸羽仁話蘋果雖然出機量少，但佢採取高價策略，未必代表佢盈利唔靚仔，所以分析員話佢業績好過預期，呢個係比較機械式睇法。
蘋果現任行政總裁庫克係個行政型領袖，佢喺業務發展創意同教主喬布斯無得比，但喬布斯搵佢接任係睇中佢可以穩守，由佢頂住盤生意至少可以捱到10年8年無問題，咁好似周瑜死咗，搵個無咁勁但穩穩陣陣的魯肅頂住，雖然唔可以打敗曹操，但點都可以捱到最後先滅亡，所以蘋果無咗光芒，但仲有好多老本可以食。
作為一隻科技股，已經無乜概念，只係穩穩陣陣，所以佢業績可以話好過預期，但實際唔算有驚喜，未來亦睇唔到佢可以扮演領袖股角色。
睇番美國O依家幾隻科技龍頭股，蘋果有啲中年肥胖唔係咁打得，facebook同Google增長都放慢，O依家最勇猛係亞馬遜，咁有啲獨力難支，相信未來呢個領域要最需要係等到有新領袖。
蘋果業績好，手機設備股表現不過不失，瑞聲科技(2318) 微跌0.1元，收報113.5元；舜宇光學(2318) 收報113元，跌2.6%。
好醫生有唔怕食
美股偏軟，恒指低開318點後愈插愈深，半日最多跌605點，盤中低位見30118點，下午大市跌幅稍為收窄，恒指收造30313點，跌410點；國企指數收報12018點，下滑174點，成交1011億元。
科網股表現都仲係唔係幾得，騰訊(700) 跌2.14%，收報385元；受惠娛樂場中場博彩毛收益增加，澳博(880) 今年首季賺7.3億元，按年增長近26%，經調整息稅折舊及攤銷前利潤(EBITDA)增17.1%至9.87億元，期內總淨收益增7.1%至85.97億元。澳博逆市急升5.17%，收報8.75元。
平保(2318) 再跌1.4%，收報75.65元。平保分拆出嚟的平安好醫生(1833) 今日在主板掛牌前夕，暗盤開報60元，最新報60.65元，較招股價54.8元，升8.85元或16%。平安好醫生有1500億元認購，公佈招股結果，一手100股，中籤率60%，認購50手始穩獲一手。以呢個分配比率，現實啲睇，股民都唔會期望佢重複升一倍咁誇張的回報率，如果有16%升幅算係唔錯，有呢個水平已經值得食胡。
咪盲目追科技半新股
由於科技半新股全部走勢都係浪比浪低，個別仲穿埋底，相信首日食胡者都會唔少。
內地A股下月納入MSCI新興市場指數，金管局總裁陳德霖表示，金管局已做好充足準備，包括與銀行商討將更多人民幣流動性注入本港離岸市場，以應付資金需求增加。
金管局亦提供人民幣流動性支援，總額380億元人民幣，並與人民銀行簽署4000億元人民幣貨幣互換協議，有需要時可以啟動機制，應付流動性短缺。
內地入摩，中央先加大咗互聯互通數額四倍，紮定馬步等資金湧入，不過市場暫時就反應慢熱，恒生中國企業(2828) 又跌1.3%，收報121.3元；其他中資金融股都弱，工行(1398) 跌2%，收報6.79元；中行(3988) 下滑1.7%，收報4.17元；建行(939) 收報8.08元。
陸羽仁
金融High Tea 舊文
來源 source: http://hdfin.stheadline.com