笑到最後：再衝港交所追夢
■以港交所4月時底部248蚊作止蝕，博嚟多次拋物線上升。 資料圖片
上周三收市後，金管局發出新聞稿，指港府持有港交所（388）股份超過6%。我即刻諗：
1.世事有冇咁巧合啊？
2.不如聽日掃啲港交所。
結果周四高明不敵市場氣氛，高衝港交所，並且大大聲喺電台度
講。如此魯莽嘅操盤行為，翌日當然立即被市場懲戒。
精明的讀者可能會取笑：政府以股代息加到過6%申報水平箒，咁你都好衝，低智定白癡？高明相信一樣嘢，就係歷史永遠重覆，如果股市係十賭九騙，咁騙徒手法來來去去差不多。
如果你閱讀過去投機者對大牛市及股災嘅描述，你會發展各種特徵從未變過。例如，你覺得「科技股」將會改變未來，今次一定同以往不同，增長同股價會長升長有。當然有部份企業繼續成為偉大企業，但今浪好多自稱科技或共享嘅「獨角獸」，撇開其科技潮語buzzword，內裏只係用網站招徠嘅生意，其實好流。
返回正題，股市來來去去差不多，贏輸就在於點判斷當中「差不多」嘅部份，過去大牛市特徵，今次都差不多有齊：恒指升過三萬點、小米計劃上市、官方修改同股不同權規例、科技股「今次不一樣」、外圍危機好似一觸即發。種種跡象，全部都係受資產泡沫所吸引而作出反應。
今次市場最大爭論，在於有冇終極一升。無啦啦衝港交所，背後原因，完全唔科學，以股代息增持唔需要真金白銀拎出嚟，並無代表性，但各大牛市特徵相繼出現，惟有尊重，純博歷史會重覆發生，港股嚟多個最後晚餐先完結今次升浪。
抵博在於：買入博嚟多次拋物線上升，同今年1月時唔同，萬一睇錯，4月時已經出現一個所謂底部，即係248蚊，失守即止蝕。以上周五收市價260元計算，即係用4.62%，博港股最後會發一個好夢。
高明
http://fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.finance.appledaily.com