經濟客艙：
當股價蒸發99%後
■美國保險公司AIG，2008年金融海嘯期間股價蒸發99%。 互聯網圖片
關於心情語錄，有時候真係可以領悟出不同道理。有說無論任何人的關係都是一面鏡，它映照了你的本質。如果喺投資世界套用同一句說話，就係「無論任何買賣關係都是一面鏡，
它映照了投資者的本質。」
最近睇到美國基金經理Christopher Davis嘅訪問，佢嘅辦公室內有一幅wall of shame，可以掛於此幅巨牆上嘅股票，隻隻「有來頭」，包括美國保險公司AIG，2008年金融海嘯期間股價蒸發99%；「第一代」科網巨企Lucent Technologies，於千禧科網泡沫爆破後股價勁累跌超過九成。專程裱瀕臨破產邊緣嘅公司股票，香港也有代表，就是亞洲超級富豪超人，一樣喺辦公室都裱起張AIG嘅股票。一位美國基金經理，一位超級富豪，二人嘅財富同經歷或者存在巨大差異，但回顧投資經驗得與失，方法卻意外雷同。
聽講超級富豪裱起張AIG嘅實物股票，希望警剔孫仔孫女們等後輩，學識投資風險。Christopher擺放美國AIG實物股票嘅目的同樣精警，亦好喜歡佢嘅比喻，與其投資尋找投資回報率（ROI），不如找到投資回報失誤（ROM）仲貼地。無論作為投資者或普通人，人類係會總犯下相同嘅錯誤，毋須問點解。
Christopher喺訪問又透露辦公室展現嘅實物股票，可提醒經常犯下嘅投資錯誤，譬如「應要去做，但沒有做到」。佢亦會拎回過去五年來最差嘅五項投資項目進行大檢閱。總括嚟講，Christopher認為投資總會遇上犯錯或失準嘅機會，亦要接受從來沒有所謂穩贏嘅投資。
FB page：http://fb.com/seeforcaptain
Captain Cool
經濟客艙 - Captain Cool 舊文
來源 source: http://hk.finance.appledaily.com