財路：大昌行股息吸引到痹
■大昌行主打汽車分銷同售後服務、消費品
、物流，呢期兼拓展到醫療保健產品分銷。 互聯網圖片
大昌行（1828）上個月出售香港物業，收益等於上年全年盈利一半，主打瓣數亦掂過碌蔗，明年預測PE得7倍單位數，兼穩袋4厘息，可以贒嚇。
大昌行主打汽車分銷同售後服務、消費品、物流，呢期兼拓展到醫療保健產品分銷。2017年度，大昌行主打汽車分銷經營業績，翻過半番到近12億元，亦帶動純利增長近60%到8億元。
中汽協數據，今年頭四個月，內地乘用車產銷量同比增加12.7%同11.6%，數據佐證，期間內地汽車銷售仍然好勢頭，大昌行應該掂檔。又大昌行除咗已有瓣數，嚟緊亦會爭取成為阿媽中信（267）旗下麥當奴供應商，而集團喺橫琴物流倉儲，亦會喺今年第三同第四季開業，食住大灣區發展，亦係另一條財路。
場內專業預測，大昌行今、明兩年EPS0.515元同0.58元，預測PE8倍同7.1倍，大昌行5年平均PE10.7倍，明年預測PE，比呢個平均值平咗34%。
又大昌行上年盈利好番，立即調高派息回饋小股東，往績息率回報4厘，派息比率近39%，若果以專業預測EPS計，大昌行就算KEEP住呢個派息率，今、明兩年息率回報都有4.8厘同5.4厘，吸引到痹。
大昌行上個月公佈話出售香港麗晶花園商場同車位，回籠4.2億元，估計收益4億元。物業出售，提供額外利潤，成績單靚仔啲之餘，又憧憬或者有特別甜品。
買大昌行，當明年預測PE上番5年平均值近11倍水位，大昌行現價4.26元，都講緊要升52%到6.48元。
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.finance.appledaily.com