財經評論：職場「老鼠屎」生存之道
■職場上總會有啲靠「唔做唔錯」、「hea做」同「鬥長命」而上位嘅老海鮮。資料圖片
「劣幣驅逐良幣」呢個經濟學理論好早就演變去到市場、職場甚至政治上，前排我做廣告嘅老友阿強（真係仲有人叫阿強）就捉咗我出嚟呻，話佢公司有個千年老海鮮，靠住「唔做唔錯」、「hea做」
同「鬥長命」再度上位，而帶佢出身嘅大哥就已經頂唔順跳咗去另一間agency，問我點算好。
阿強當初以為政府先會有呢一類老海鮮，所以決心唔考政府工，明知日日OT都投身講求創意嘅廣告業，但就估唔到公司都有咁大粒「老鼠屎」。佢話老海鮮未回朝之前已經日日hea做，只不過當時有幾個做得嘢嘅大哥喺到，先冇人為意佢嘅存在，甚至唔根本冇人知佢做緊啲乜。直至前排公司瘦身，幾個聞到味嘅大哥已經搵定好路數，阿強嗰陣仲以為點都會係老海鮮走人先。
阿強實在太天真啦，一個可以靠「厚面皮」、「唔做唔錯」，日日喺度hea都生存到咁耐嘅老海鮮，又點會冇佢嘅生存之道？只要練好「卸膊操」，令到能者多勞，咁多勞者做到咁上下自自然然就會心灰意冷，或者有更好出路，最終「怕咗佢」而離開。資深同做得嘢嘅走曬，老海鮮又會變成最重要員工，再度上位，然後再度施展「卸膊操」，等待「能者」嘅出現。
好彩阿強喺行內都做咗幾年嘢，啱啱拎到個廣告獎看嚇門口，所以我就叫嗱嗱聲交信走人，廣告界要成兩個月通知期，交咗先慢慢搵工都未遲啦。其實「老鼠屎」嘅存在，最大責任就係老闆，如果唔及早處理，好哋哋一鍋粥就會就咁玩完。如果粒「老鼠屎」就係老闆，好似前排政界嗰兩位咁，仲要死都唔肯退，咁你唔係仲有期望嚇嘛？
記者：梁偉聰
財經評論 舊文
來源 source: http://hk.finance.appledaily.com