操盤手札記 - 割柑人 2018年6月12日
操盤手劄記：女星股博唔博？
■卓珈控股近期申請轉往主板。圖為主席黎珈而。 資料圖片
剛過去嘅周末，七國集團（G7）七國咁亂，貿易對立惡化。本周繼續上演大龍鳳，周二有美朝𥧌會；周四有美國聯儲局、歐洲央行議息，另有世界盃開鑼；周末之前，仲有美國公佈對中國500億美元關稅最終清單。港股升勢，撐得幾耐？
特朗普打貿易戰，連盟友都唔放過，皆因佢認為美國喺貿易上被各國佔便宜，因而每年有8,000億美元貿易逆差。呢個講法好tricky，根據美國官方紀錄，連同服務業，美國喺2016年仍有貿易順差，斷估奧巴馬政府唔會做假數啩！5月美中貿赤按月增11%，睇嚟美國又有故講。
面對國際貿易糾紛同美國加息，熱錢轉嚟轉去。觀乎美股，反映科技股嘅納指同反映細價股嘅羅素2000指數，喺上周創新高之後，就見資金轉炒金融股。至於港股，科技股同細價股上周亦見炒作。當中，申請轉往主板嘅卓珈（8358），三日炒高六成，非常搶眼。
卓珈從事醫學美容，主席兼行政總裁係息影女星黎姿（現名黎珈而）。咪以為細細粒（黎姿喺《古惑仔》角色）嘅公司細細粒容易食，該股舊年1月10日以配售形式喺創業板上市，翌日高見5.05元，較配售價0.8元高5.3倍，但一個月後已由高位回落一半。當日高追，喊都無謂。
明星效應加創業板配售上市，喺卓珈之前，有2016年4月12日掛牌嘅聯旺（8217）同2003年11月19日掛牌嘅修身堂（8200）。前者創辦人係藝人黃翠如老豆；後者創辦人係息影女星張玉珊。聯旺試過累升99倍，之後高位回落99%；修身堂試過由毫子股升呢蚊股，之後跌落仙股。
除咗創業板，主板亦有「女星股」，包括歌星李玟老公打骰嘅利標（787）、息影女星邱淑貞老公係老闆嘅I.T（999）。前者蚊股變毫子股；後者近日績後爆上，但相對歷史高位仍輸三成。五大女星股，你有冇掂過？卓珈轉主板，博唔博得過？都係嗰句：博唔博，輸得起先好博。
割柑人
本欄逢周二刊出
割柑人
操盤手札記 - 割柑人 舊文
來源 source: http://hk.finance.appledaily.com