大棋局：本周大事浪接浪
■今日的美朝𥧌會，政
治、財經、娛樂三種觀眾同時關注。 資料圖片
今個禮拜資本市場好唔得閒，大事一浪接一浪。首先係6月12日全城聚焦美朝𥧌會。特朗普，一個慣常以叫價拋窒對家嘅71歲商人總統，同金正恩，一個動輒以核武恫嚇周遭嘅34歲青年元帥，政治、財經、娛樂三種觀眾同時關注，一場最精彩的show hand就要展開。
現時已經係2018年，曾經留學瑞士的金正恩心中有數，逼台下國人對自己呼天搶地演繹激動嘅戲碼玩唔到幾耐，朝鮮終須要開放，而且就在佢任內。留一手，只對共產主義友邦開放，還是對全球開放？若是後者，那必然需要美國介入。
很顯然金正恩選擇了後者，但基於國內各種生活所需仍相當依賴中國，金正恩只能盡量做到兩面不得失。
問題就在此。假若美國要求在北韓與中國接壤邊境安裝軍事雷達，中國當然會反對，金正恩做定唔做？將來北韓搵到錢後，美國要對其軍售，金正恩接定唔接？
𥧌會只係開始，事成後金正恩必須長期遊刃於兩大國之間，其實係非常難做，非常考驗其政治手腕。北周武帝宇文邕在位12年先殺權臣宇文護，金正恩上台後即連番搞掂不少老臣，可想而知伺機反撲之力不會少。外要兩面討好，內要鎮懾舊派既得利益者，佢做唔做到唔知道，但起碼志向不小。
歐美角力 商家跪低
另一邊廂，伊朗則連選擇嘅餘地都冇。伊朗係OPEC第三大產油國，全球第五大產油國。美國40年唔出口石油，𠵱家要轉型為能源出口大國，因此伊朗無法好似北韓咁以發展核武為恫嚇，換取講數條件。
中興（763）事件殺雞儆猴，歐洲政府仍在同美國角力，商家已率先跪低。外媒報道，包括歐洲最大煉油廠法國Total、意大利Eni、西班牙Repsol等公司已準備停止同伊朗買油。
跟住6月14日聯儲局議息，九成機會再加息。香港銀行體系結餘有機會跌穿1,000億港元，香港遲早都要跟加息。美元轉強，阿根廷、巴西、菲律賓等新興市場貨幣出現如2015年的急跌。其中要特別留意沙地里亞爾，因沙地里亞爾係同美元掛鈎，在美元轉強，且石油美元迴路逆行情勢下，會否引發沙地里亞爾脫鈎將會係嚟緊幾年嘅重要事項。
然後6月15日，美國公佈對中國的500億美元關稅清單。早前5月29日，白宮突然發表聲明仍然會對500億美元中國商品抽25%關稅，清單會喺6月15日公佈。最後抽唔抽，抽幾多，相信同美朝𥧌會結果也有關。今個禮拜買定啤酒同花生。
Mr.Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.finance.appledaily.com