操盤手劄記：誰與息魔最合拍
■在眾多息口敏感股中，恒生銀行的敏感度最高。 資料圖片
世界盃上周四開波，揭幕戰由東道主俄羅斯對沙地阿拉伯，世界最大兩個石油出口國對戰，俄羅斯總統普京同沙地王儲穆罕默德，坐喺包廂傾乜都得，唔使等產油國開會。翌日，油價急跌3.75%，傾掂增產嘛！
講番場
波，俄羅斯大炒沙地5比0，江湖傳聞同莊家等錢使有關。
講到錢，股市升跌，都係錢作怪。內地半年結水緊，三招放水冇料到，中港股市已連跌三日。另外，美銀美林調查顯示，環球基金經理15個月嚟首度增持美股，增持嘅錢，估計嚟自新興市場，包括中港股市。冇錢冇運行，加上貿易戰開打，中港股市都幾閉翳。
今年3月起，貿易戰已被基金經理視為金融市場最大嘅尾部風險（tail risk），即係發生機會難料，但殺傷力大。此外，美國加息步伐加快，美匯指數觸及95，上月曾經出現金融危機嘅VITA——委內瑞拉（V）、義大利（I）、土耳其（T）、阿根廷（A），再有賴債之虞。
美國加息確係會令熱錢回流美國，但其實VITA喺政經上各有催命符。講到受美息影響，香港真係受曬，皆因實施聯匯；不過，香港外匯存底夠厚，仲頂得住。
美國今個加息周期，已加息7次，合共1.75厘，香港一直未跟，但隨著港美息差擴闊，資金流走，下半年隨時鬱手。
本港銀行調高最優惠利率（P），雖然不利股市，但就有利金融股，尤其本地銀行股，匯控（005）、恒生（011）、東亞（023）、中銀香港（2388）等，都可受惠淨息差擴闊。睇股價圖，匯控、東亞、中銀都見10天線升穿20天線，出現黃金交叉。
不過，講到息口敏感，根據花旗報告，恒生敏感度最高。若港息上調0.25厘，恒生稅前盈利將增加2.3%，比起匯控、中銀、東亞分別增加0.8%、0.6%、0.3%為高。若計及美息、港息各上調0.25厘，恒生淨息差將擴闊8.44點子，跑贏匯控、中銀、東亞分別擴闊3.39、4.18、1.91點子幾條街。
割柑人
本欄逢周二刊出
割柑人
操盤手札記 - 割柑人 舊文
來源 source: http://hk.finance.appledaily.com