大棋局：迎接大爭之世來臨
■特金會後，特朗普（右）稱讚金正恩very smart，意思係金正恩會識得揀未來北韓條路點樣行。資料圖片
46年前發生過這樣一件事：趁中蘇交惡之際，尼克遜訪華拉攏中國共抗蘇聯。自此中國雖然牌頭仍掛名共產主義陣營，但已經同西方國家有偈傾。
當時由日本出面借錢畀中國，日本長期作為中國最大貸款國。中國人的勤奮，日本的資金，西方國家的市場，造就了中國改革開放後的經濟躍飛。金正恩顯然想模仿中國昔日做法，先搞核武令自己有碇企，同美國傾但照舊掛名共產主義陣營，然後改革開放。
於是美朝𥧌會上特朗普拿出iPad，播一條高清片畀金正恩睇：要回去封閉嘅軍事對峙局面，還是迎接有錢齊齊搵嘅未來？一念天堂，一念地獄。特朗普會後稱讚金正恩very smart，意思係佢會識得揀。
除了金正恩曾在瑞士留學見過世面，也因近10年南韓做得太好。同一個民族，當全世界都在用南韓三星電子產品，能夠分庭抗禮的只有特朗普手上那部iPad；當南韓人對住台上熱褲妹妹仔明星狂歡吶喊，北韓人卻要對前朝老坑涕泗縱橫；當中港台街道上無論18還是58歲阿姐都學南韓人畫一字眉，北韓人就連一支Bobbi Brown眉筆都得來不易。南韓的好突顯北韓的劣，時間唔多，特朗普看到，金正恩也看到。
美中朝各有算盤
過去中國係北韓問題的中間人，中間人的存在價值係要拎好價。然而特朗普發現呢個中間人畀唔到好價，而且以此為籌碼同自己講數，咁就唔要中間人。中國竭力展現於北韓問題上仍然重要，可是只換來特朗普一句：不認為中國對北韓嘅影響力，能作為貿易戰嘅談判籌碼。6月15日美國推翻早前的談判結果，重新宣佈對中國500億美元商品徵收關稅。
中國外匯儲備可保持3萬億美元上下，貿易順差為一大助力。一旦中國貿易順差大跌，外匯儲備亦會跟住跌。一舊黃金的價值係睇其成色，即其含金量。一隻貨幣的價值亦睇其成色，當未成為國際流通貨幣時，要人信，就睇你嗰隻貨幣可兌換幾多可自由流通的貨幣。簡單地講，就係含美金量。
今日之局面，其實中國心中有數遲早會嚟，因此中國一早在做三件事。其一推人民幣國際化，曾嘗試以攻堅SDR為捷徑；其二嘗試改變人民幣發行的抵押品，其中最希望用地方債代替；其三為一條側支，發行央行數字貨幣，因數字貨幣定錨唔會係美金。三件事未做到，而貿易戰已經開波。
美中朝三個國家，三個男人都有志做一點事，我哋習慣和平太久，要準備進入大爭之世。
Mr.Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.finance.appledaily.com