【財演算法】永遠有效策略的風險管理（蔡嘉民）
2018-7-10 9:51:42
波動率風險溢價(Volatility Risk Premium)係一樣永遠都可以賺嘅東西，只要你敢收，市場就會肯俾。但重點係你要識計風險數字(Risk metrics) 。好多時大眾做期權果陣都會
選擇做價外(OTM)期權，因為做Long side有爆發力，做Short side可以降低俾人入價嘅機會。但往往做短倉果陣會被佢弱小嘅對沖值(Delta) 或者期權金 (Premium) 所欺騙。通常大家可能會揀Delta 0.2嘅期權去Short，以現時恒指為例，0.2 Delta嘅Call只有大約130點，依家高窩(Volatility)又月頭還好，去到月中分分鐘得80點時間值，5000蚊都無，Short左都無肉食咁濟。咁就可能會順手做多一兩張。
假設個Account入面有30萬，呢個做法看似無問題，但其實做一張嘅貨值已經等於29,000 x 50 x 0.2= 290,000元，即係你買左29萬嘅盈富基金。帳戶嘅槓桿已經逼近100%。如果做左3張，情況仲大劑，槓桿率達到290%!
個市之後如果向你預期嘅方向鬱都無咩問題，但如果你估錯方向，一接近你嘅行使價，舉例去到Delta 0.5，一張嘅貨值就係29,000 x 50 x 0.5 = 725,000元，3張就係2,175,000元，除去30萬嘅帳戶，槓桿比率就係725%，極度危險。最恐怖嘅並唔係Delta，而係Gamma。當去到月尾，Gamma會大大增加，股價可能只要上升1%都唔洗，期權Delta已經可以去到1。到時貨值1張就係等於1張大期，1,450,000元，3張已經係4,350,000，槓桿1500%。恒指每升1%，個帳戶就會虧損15%。
所以做期權短倉除非你有程式可以幫你動態對沖 (Dynamic hedging)/平倉/搬倉，否則決定注碼時一定要計清楚相對嘅貨值係幾多，而且唔想過度使用槓桿的話，最好直接假設期權嘅對沖值為1咁去做短倉，效果就等於無槓桿。所以，如果想運用上一篇提到嘅永遠有效嘅策略，長期不論牛熊市都做Put write或者Short strangle的話，就要有心理準備大市最壊打算可能會向下20%，如果你可以承受帳戶虧損20%的話，直接使用無槓桿就係最適合你嘅Position sizing(注碼)了。
財演算法 - 蔡嘉民 舊文
來源 source: http://www.winmoney.hk