智取大市：人民幣心理戰術
■之前傳中央喺人民幣6.7水平會維穩，點知跌破6.7，有形之手正在測試市場底線。 資料圖片
人民幣急跌嘅時間，固然港股亦會下跌；人民幣升值同靠穩嘅時間，港股則偏向有利。之前傳出中央喺人仔6.7水平會維穩，點知都跌破6.7，有形之手正在測試各位底線，亦令股市坐貨
朋友嘅捱價時間拉長咗。
呢一刻你問100個分析員，100個都相信中央承受人仔貶值嘅容忍程度高咗，而冇人認為人仔走勢呢一刻會失控，正因為咁，中央反而有空間令人仔貶多少少，保持喺遠未至於令市場失去秩序嘅水平就得。呢個係2015年8月時嘅分別，呢一刻市場明顯冇2015年8月咁恐慌，當然股市都係跌，保持較長較慢嘅跌，但同2015年下半年嘅股災級別就冇得比了。
P2P平台爆煲，呢個未償還貸款規模1.3萬億人民幣嘅行業，一個浪隨時令大半個行業淹沒。須知道P2P平台監管少，一直以來好多人都知風險相當大，但已知高風險兼有限數字，暫時睇，危險極都有個譜。
真正危機永遠喺原本個個覺得穩陣、冇人會覺得跌嘅地方出現，當事情急轉直下，就會引發人踩人，就好似十年前雷曼爆煲一樣，邊有人估美國政府見死不救。今時今日嘅中國，樓市、剛性兌付理財產品先係真正危險嘅地方，如果唔喺呢啲方面爆炸，理論上中央係能夠駕馭人民幣貶值趨勢。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com