金融High Tea - 陸羽仁 2018年7月20日
大戶執平貨 小戶在觀望
2018年07月20日
美股繼續升，港股繼續跌，似乎呢個夏天係考驗投資者耐性嘅日子。美國聯儲局主席鮑威爾呢兩日放鷹，對華爾街股市氣氛冇造成衝擊，香港市底就明顯較弱，人升佢無得升，一來係前景不明朗，暫時睇唔到有乜好消息；再者係見唔到有新錢流入，令大市缺乏動力。
投資者謀定而後動，反而公司有動作。去年完成大動作嘅會德豐(020) ，宣佈私有化新加坡嘅子公司。會德豐近年簡化系內結構，減少細小上市公司，同時分拆九倉收租物業作為房託。今次私有化新加坡公司，相信係沿住呢個思路。
會德豐趁新加坡辣招食胡
會德豐喺新加坡搞地產多年，但當地樓市係由政府主導，大部份人住喺政府出售嘅資助房屋，私人市場只係集中喺豪宅，當中仲有唔少政府持股的地產公司，所以會德豐新加坡公司起樓賣樓唔算活躍，手頭主要持有一批收租物業。
新加坡樓市喺政府曾經放鬆調控措施下攀升，為咗應對樓價升勢，政府月初掉轉槍頭宣佈加辣，而且兇狠程度遠勝香港的樓市六招，令到當地地產股大跌，會德豐今次趁機出手，簡化架構之餘，仲有順勢執平貨味道。
會德豐系近年明顯活躍咗，公司又拆又收，全部都係講計數。去年集團就完成分拆屬下九龍倉置業(1997) ，陸羽仁同熟悉公司的人傾起，佢話好多人當九置係收租股，實際佢有半隻係零售股，皆因佢屬下商場租金係分成，零售生意好，佢哋就分得多。雖然佢哋唔開舖頭，但商場生意就同零售業直接掛鈎。今年首季零售業暢旺，海港城係龍頭商場，生意增長更加強勁，所以只睇第一季表現，真係「掂過碌蔗」，關鍵係中美爭拗，加上美元咁強，對香港零售業未來影響就好難預測。
睇番今年九置股價正正反映咗呢個走勢，喺過咗第一季創65.15元高位後，升勢本來有啲未盡，後來受到大市氣氛轉弱，佢開始碌番落嚟，現價56元，差唔多去番年初位置，但比起大市表現仍然較佳。從另一個角度講，亦可以話佢跌得未夠平。九置O依家派息率1.7厘，以房託嚟講唔算好吸引。同其他房託比，佢嘅優點係物業質素好，而且營運能力強，唔同好多房託主要坐喺度收租。
人仔六連跌 港股難跟升
除咗個股消息，市場O依家仲等緊大市探底。美元強，人仔兌美元加快貶值，離岸價失守6.79，日內跌超過450點子。在岸人民幣跌穿6.76兌1美元，日內跌逾400點子，再創一年新低。官方開出人民幣中間價跌破6.7關，下調152點子，連跌六個交易日。離岸人民幣跌幅更擴大，急跌600點子，報6.8029兌1美元，創去年七月中旬後約一年低位，較在岸收市價低近300點。此外，人民銀行連續四日淨投放，單日就淨投放700億元人民幣。人仔受壓，內航股齊齊見紅，國航(753) 挫近5%，收報6.66元；南航(1055) 跌近6%，收報5.11元；東航(670) 則跌5.3%，收報4.79元。
喺人行放水下，A股依然乏力，港股都無得跟住美股升，恒指曾跌穿28000點關口，低見27998點，收報28010點，跌106點，創去年九月以來收市低位；國企指數收報10523點，下滑55點，成交774億元。騰訊(700) 跌0.63%，收報375.6元；小米集團(1810) 急挫6.7%，收報20.1元。
陸羽仁
金融High Tea 舊文
來源 source: http://hdfin.stheadline.com