一路一帶：港女教你大數據分析
■近年興起很多新詞彙及網絡術語，港女教你大數據分析。互聯網圖片
近年興起很多新詞彙及網絡術語，筆者綜合各大用詞，以近年香港所遭遇的「小確幸」，用故事形式為各位講解。
是咁的，有位中國男同港女拍拖48年，喺97終求婚啦，國男同港女講：「你嫁畀我啦，我保證結
咗婚都保持一國兩制，財政獨立，五十年不變，日日愛護你，仲會每年送大禮！」
雖然港女比國男大幾十年，都做得佢阿媽啦，但唔知點解，同國男拍拖出街，出面嘅人都會叫國男做阿爺，叫港女做阿仔，就好似iPhone X嘅Face ID成日認錯樣咁。
港女將港男嘅各樣求婚保證對話影低，可喺facebook、Wechat、IG、抖音、推特等等開心Share，呢啲就叫做「物聯網」（Internet of Things）。正所謂傾偈有相有偈傾，各位朋友睇到曬，做埋見證，等國男冇得反悔，呢啲就叫做「區塊鏈」（blockchain）。
結婚係人生大事，當然要中英文寫低聯合聲明，港女於是做功課，翻查兩人對話資料紀錄，結果發現驚人真相，原來國男將以上嘅求婚保證講咗十萬八千次，比起講我愛你、血濃於水更加多，但其實國男講咗咁多次，做到嘅只係得1%，呢啲就叫做「大數據」（Big Data）。
港女於是用百度，上知乎問真啲，發現原來男人講嘢，只可以信一成，咁都未算低，國男嘅承諾完成比率只得1%，比普遍男人仲要低，呢種學習過程叫做「網絡審查」（The Great Wall of china）。
根據電腦分析，國男講嘢完全唔可信，容易過揀35%係J、65%係7，答案擺到明係嫁唔過，呢啲就叫做「人工智能」（Artificial intelligence）。
不過港女唔理客觀事實，照樣或被迫嫁畀國男，呢啲不幸事件可以叫做「404 error」或者叫……「回歸祖國」。
後記：近來假疫苗事件轟動全中國，筆者曾經記得，國務院前總理溫家寶喺三聚氰胺奶粉毒奶粉時講過，要查證事件，中國食品安全要兩年內做好。今次李克強話假疫苗超越人類道德底線，習近平話要查到底；筆者認為，道德度底，外國才有，中國大家話有冇呢？今次查完，之後呢？
斯郎
斯郎
一路一帶 - 斯郎 舊文
來源 source: http://hk.finance.appledaily.com