大炒落後股
2018年07月26日
放水效應昨日繼續發揮，加上美股前晚造好，港股升至逼近29000點關，開始接近心理阻力，成交跌至只有八百幾億元。如果無新消息，唔排除個市要喺呢啲位鞏固吓，消化升幅再定後向。
發聲明轟炒股才子
港股炒反彈，熱炒主題集中一些落後股如俄
鋁(486) ，美國財政部長姆欽日前話，對撤銷制裁俄鋁抱開放態度，不希望俄鋁破產，周一已經刺激俄鋁急升，周二唞一日後，俄鋁昨日再升7.7%，收報2.52元。
中環茶友話，個市好返啲，大家搵嘢炒，落後的材料股就成為短炒焦點，預計未來一兩日仲會輪流炒。
另外，市場八卦話題係鷹君豪門爭產案呢兩日又有新劇情。有炒股才子加入戰團，今次矛頭指向家族中人氣最高的羅公子羅康瑞。羅公子不忿俾人抹黑，同阿哥羅嘉瑞聯手發聲明反駁，仲質疑對方有誹謗之嫌。
鷹君羅家近年內訌，創辦人羅鷹石的元配杜莉君打官司，要炒家族基金信託人滙豐。呢單官司主要係家族分成兩派，一派係以羅嘉瑞為首的主政派；另一派係以羅啟瑞為首的在野派。呢單官司慢慢變成雙線發展，法庭官司就係成百歲的杜莉君要攞番權，外界估計佢係企喺細仔羅啟瑞一邊。另一線就係庭外的口水戰。呢兩日口水戰場出現新變化，有炒股才子喺網上爆料，質疑2004年時羅氏家族信託持股由53%減至33%，是源於羅公子要求派股救自己。
對於呢個質疑，羅公子相當火滾，立即登報反駁，仲話會考慮追究。據羅公子指出，自己從來沒有要求分派股份。當日安排是為了讓羅氏兄弟可更具彈性處理鷹君股份，故將瑞勝所持的鷹君，按各人在瑞勝持股量分派。事實上，大仔羅孔瑞、二仔羅旭瑞、四仔羅康瑞和另外兩個阿哥，根本沒有獲分派任何鷹君股份。而在派股後，羅家持有的鷹君股份大致無變，直至2006年羅啟瑞沽清所持鷹君，才令羅家整體持股下跌。
除咗派股外，炒股才子又話鷹君主席羅嘉瑞自己開了一間慈善公司，然後將分派的錢放入這間公司來買自己股份，慈善基金10%帳目未能交代。呢個說法其實之前都有流傳，但羅嘉瑞方面就澄清，慈善基金共用了超過3000萬元做善事。而基金投資組合有兩隻股票，分別是冠君(2778) 、朗廷(1270) 和其他債券投資，但一直沒有持有鷹君(041) 。
由於當事人反應激烈，據聞才子都將相關評論下架。有人奇怪，本來其他人的家事，炒股才子點解要拋頭露面去做醜人呢？答案無謂估，但羅公子喺政商界都係名人，忽然家族出現爭產，佢好容易就會惹事非，呢啲叫做樹大招風。唔知係咪受消息影響，所以昨日個市雖然上升，但鷹君股價就逆市微跌，收報38.55元，下跌咗0.4%。
暑假到濠賭股飆上
相嗌唔好口，事非搞到鷹君無得升，但大市喺中央力谷下，連升四個交易日，累積升超過900點。指數逼近本月高位，高見28964點，昨日再漲258點，收報28920點；國企指數升100點，收報11074點，成交縮減至863億元。
藍籌最省鏡係恒生銀行(011) ，破頂曾高見206.4元，收市漲1.5%，報206.2元。內銀股升幅跟唔上大市，工行(1398) 上漲0.5%，收報5.85元；建行(939) 收升0.7%，報7.19元；中國銀行(3988) 上揚0.3%，收報3.69元；農業銀行(1288) 升0.8%，收報3.85元。
今期輪到濠賭股發威，踏入暑假旺季，濠賭股走俏，銀娛(027) 收漲3.6%，報64.7元；金沙(1928) 收升4.4%，報41.5元，為表現最好的藍籌股。永利澳門(1128) 上揚4%，收報24.75元；新濠(200) 獲花旗將目標價由29.5元調升至30.5元，維持「買入」評級，股價揚5%，收報24.15元；美高梅(2282) 飆升9.45%，收報18.06元；在柬埔寨經營賭場的金界控股(3918) 業績好，抽高9%收報8.35元。
內地股市昨日微跌一點唞氣，未來港股仲有無得去，都要睇內地個市。
陸羽仁
金融High Tea 舊文
來源 source: http://hdfin.stheadline.com