魚樂無窮：轉移視線救市法
■阿爺出動嘅轉移視線分心大法，同淩淩漆聚精會神睇咸帶鑿骨攞彈頭沒有分別。互聯網圖片
港股連升4日，累積升幅近千點，由死氣沉沉變成氣勢如虹，一切源於周初國務院常務會議，提出積極財政政策要更加積極，穩健貨幣政策要鬆緊適度。
市場憧憬放水在即，基建資源股全部報復性
反彈，內銀內險股亦順勢而上。
「明明人民幣仲跌緊喎，點解個市冇事嘅？」明顯地中央放水救市，已搶去市場焦點，淡友亦不敢再沽落去，平倉食糊令反彈力度更強，阿爺呢招轉移視線分心大法，同《國產淩淩漆》嘅聚精會神睇咸帶鑿骨攞彈頭沒有分別。
可以預期，人仔帶來的問題可以暫時放低，唯一憂慮是特朗普再出招搞局。不過，佢上周五威脅向全部中國進口、總值5,000億美元產品加徵關稅嘅言論，未有推倒大市，反映市場對消息開始麻木。今趟如果踢得穿29000點，升多一千幾百絕不出奇。
時代地產（1233）月初公佈上半年銷售數據，期內累計合同銷售額約260億元人民幣，按年增長53%，簽約建築面積150.8萬平方米，按年增長29%。銷售金額增長勁過土地面積，證明加價依然去到貨。最新仍有近五厘息墊底，夠曬防守力，加上受惠放水概念，下周二放榜在即，不妨趁勢炒一轉。
唐牛
http://fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.finance.appledaily.com