魚樂無窮：驚到iBond都搶！
■大市創一年新低，防守股強到無朋友，連iBond都大成交破頂。 資料圖片
美元持續強勢，金管局三個月來再度承接港元沽盤，走資恐慌再次升溫，拖累恒指曾創一年新低。
周初曾經講過，今輪跌市要防範火燒連環船現象，結果即時應驗︰星期一教育股，星期二科網股，星期
三科網教育打孖上，再加埋燃氣同醫藥。
估值高固然累事，更大鑊係唔少炒友靠按倉搏命，當股價跌至警戒水平，經紀行即時追收孖展，冇錢補倉唯有沽其他股票套現，形成惡性循環，所以嚟緊見到有股票無厘頭大跌，唔使大驚小怪。
相反，避險情緒高漲，造就中電（002）、煤氣（003）、領展（823）等防守股強到無朋友，近日連最後一隻iBond（4231）也大成交破頂，點解投資價值欠奉的工具都照搶？有戰友報料，話基金已經買爆公用股quota，所以流通量極低嘅iBond亦被吼中，有殺錯冇放過！
自然美（157）上月底宣佈，大股東蔡燕玉獲洽購51%股權，每股作價0.9元，一旦交易完成，將觸發強制性全購要約，潛在買家為台灣東森國際，與台資背景的自然美同聲同氣。近日股價拾級而上，與潛在要約價差價收窄至不足一成，買賣協議暫定於9月10日確立，成事與否好快就知！
唐牛
http://fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.finance.appledaily.com