內房物管股止當候贖
2018年08月30日
港股反彈一輪後進入牛皮階段，資金又再有炒番傳統股跡象，恒生(011) 同長和(001) 等幾隻傳統藍籌股造好，反映投資氣氛審慎。
喺淡靜氣氛下，有中環茶友留意到，早兩日內房物管股有退潮跡象，由於呢類股份今年升勢唔錯，所以
佢都關心醫療同教育板塊，會唔會出現大調整。
內房物管股備受青睞，主要係收益穩定，而且新落成物業不斷增加，得到個高增長概念。咁究竟茶友點解會擔心退潮呢？除咗留意到呢個板塊周初出現較明顯跌幅外，仲因為有唔少內房物管股準備上市抽水。
內地除牌湧港上市
內房分拆物管股上市，最早係幾間龍頭公司好似中國海外(688) ，跟住愈來愈多公司上市。最先上市的物管股因為係新板塊，估值唔高，但隨著業績對辦，股價造好，同類公司上市都有表現。
其實，物管板塊喺內地早已成型，部份喺新三板上市。隨著香港呢類公司增加，同埋估值唔錯，吸引咗部份內地公司喺內地除牌，走嚟香港上市。好似之前新三板有間公司叫永升生活服務，母公司係內房商旭輝(884) ，本來喺新三板掛牌，年初退市後，現在已提出來港上市。內房物管公司又除牌又掛牌，搞咁多嘢主要係因為香港畀到高估值，於是吸引咗這類公司，所以估計未來仲會有好多內房公司，分拆物管公司上市。
公司趁高估值上市，反映咗兩點，一個係以行內人角度，股票價錢好好，而且香港價錢仲高過內地；二係有需求就會有供應，當供應增加，就要有更多資金投入，先可以支撐到價格，呢個情況喺新經濟股，科技股已經出現，成為股場的地心吸力。
茶友話，物管股除咗收入穩定，仲因為加入互聯網概念，所以推高估值，但內地顯然對呢個概念，無香港咁受落。內地人使用互聯網比香港普及，他們的反應會不會比香港更貼地呢？本地物管股O依家市盈率，大約係十幾倍到二十幾倍，大公司好似中海物業(2669) 市盈率係27倍、雅生活(3319) 有32倍，係比較高的幾隻。經過前兩日調整後，昨日股價跟隨大市反彈，中海生活升1.6%、雅生活升2.4%，中奧到家(1538) 升1.8%。喺預期佢哋供應增加下，手頭若有賺錢嘅貨，可以分段食胡，實行止當候贖策略，若然未進場想低撈，就要做定兩手準備。
投資者對二三線板塊戒心增加，資金主要留喺藍籌股，成交變咗唔多，港股雖然浮浮沉沉後微升，恒指收報28416點，升64點；國企指數收報11083點，跌14點，成交跌到去801億元。連彈多日的騰訊(700) 回跌1.3%，收報360.8元。即將晉身申洲(2313) 曾高見104元創新高，收市續升2.39%，報103元。
東亞失成份股非戰之罪
被恒指公司剔除成份股資格的東亞銀行(023) 宣佈，上半年股東應佔溢利39.92億元，按年跌35.82%。每股盈利1.3元。若撇除2017年同期因出售Tricor(卓佳)所獲得的淨溢利約30億元，來自持續經營業務盈利，按年升25.89%；中期息派0.51元，按年跌25%。明年是東亞成立100周年，管理層透露，董事會會基於業務發展、資本運用等，全面考慮會否增加派息，或派發特別股息。東亞做咗34年成份股，但O依家中資股已佔港股總值60%以上，喺大公司不斷增加下，東亞出局可以話係非戰之罪。東亞收市報28.95元，升1.4%，中銀香港(2388) 績後跌2%，收報38.45元，滙控(005) 跌0.07%，報70.15元；恒生(001) 就持續強勢，升1.53%，報213元。
陸羽仁
金融High Tea 舊文
來源 source: http://hdfin.stheadline.com