智取大市：未跌夠的絕境？ - 晉佳
𠵱家港股似係肯定會跌，但又唔使絕望地睇死幾個月後市況必差，話唔定仍有機會出現。 資料圖片
近期港股分析一面倒睇淡，政治因素令港股負面想像無限放大，投資者見壞消息就喪沽，馬鋼（323）一棍13%跌到落通道底，可見中雷機會日日有，資金短
期搵地方套現，但已顧唔到有冇棚去沽貨，形成非大成交之下股價重創。執筆時夜期低水逾300點，投資者下一日只會繼續搵下一批出氣袋，直至嚴重超賣。心態上一味避雷等反彈並不實際，反而優質而已中雷股份，仲值得分段吸納持有。
美股方面，亞馬遜連日調整，見頂未？雖然今年升勢轉急，算係長線近見頂訊號之一，但呢類股王，日線圖MACD要破頂或有頂背馳，先能夠確認見頂。而佢嘅MACD並未破頂，反映股價有得更超買。
資金一窩蜂買亞馬遜等科技龍頭，總有一日要追落後。假如科技行業基本因素繼續淩駕於傳統行業，兩極化市況更可能出現。睇返港股，1999年年尾至2000年初有科網熱潮，5年後嘅2005年中有濠賭股熱潮，2013年尾至2014年初有濠賭科網熱潮，每隔幾年有一個少數股票稱王嘅瘋狂升市。𠵱家港股似係肯定會跌、但又未跌夠嘅絕境，但又唔使絕望地睇死幾個月後市況必差，話唔定仍有機會出現。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com