板塊輪插先忍手
2018年09月12日
港股表現繼續不濟，本來以為個市有得彈一彈，但中段稍為回升後，下午指數再跌過，恒指收報26422點，跌190點；國企指數收報10333點，下滑100點；紅籌指數收報4176點，跌38點，成交金額845億元，沽盤繼續輪流轟炸。睇嚟喺美國
制裁2000億美元中國貨生效前，個市仲在等壞消息面世。
大行唱淡濠賭股急跌
藍籌昨日被炸災區係濠賭股，大行唱淡下，銀娛(027) 急跌5.7%，破關收報48.1元，同業如美高梅(2282) 同澳博(1928) ，全部都跌近半成或以上。濠賭股淡風，藉口之一係大行德意志銀行發報告唱淡濠賭股，認為澳門博彩業開始向下，並將澳門2019年博彩毛收入(GGR)增長預測，由11%下調至4%，大削濠賭股目標價逾半。該行仲下調銀河娛樂(027) 評級，由「買入」下調至「沽售」，目標價由82元大劈至45元；金沙中國(1928) 由「買入」降至「持有」，目標價由52元降至39元。喺市況弱不禁風下，濠賭股一吹即倒。老實講，德銀本來睇銀娛82元又高咗少少，見個市腳軟，自然要削目標價，反正濠賭股O依家仲值錢，叫啲客沽佢套現得多啲，相信呢個係大行唱淡背後另一個理由。
唔同板塊輪流調整的格局未變，繼水泥股後，鋼鐵股又出現板塊大跌現象，主要係有內媒報道，話中央派官員巡查，了解鋼鐵業漲價情況，令市場擔心行業面臨政策風險增加。鋼鐵業係全球貿易爭拗風眼，令相關股價特別脆弱，一有壞消息即刻跪低。
鋼鐵行業過去一年其實相當好景，主要係內地去產能，令產品價格上調，毛利增加，鋼鐵公司盈利普遍上升，喺跌市中原本好硬淨，O依家就要面對市場逆流。以馬鋼(323) 為例，股價一開即插，之後跌幅略為收窄，但午市再跌過，結果收市大跌14%，報3.56元；鞍鋼(347) 亦挫9.34%，收報6.5元，一日就跌到入肉。
馬鋼上半年業績增長逾倍，現價市盈率不足六倍，息率超過五厘。業績公佈靚仔，過去幾個月大市下插，佢股價玩上落，已算優於大市，但沒法跑贏大市，反映市場擔心好景難以持續，主要係美國掀起貿易戰。鋼鐵係個惹起爭端的行業，就算係美國鄰居的加拿大都無面畀。特朗普係老式經濟人，成日想恢復鋼鐵行業，認為咁樣對佢選票有幫助，喺呢個大氣候下，鋼鐵股前景不明朗，隨即就喺估值上反映出來。
呢一輪鋼鐵股急插，主要係跟隨內地有官員去調研鋼材加價，外界擔心政府會限制價格，A股回調，香港鋼鐵股即時跟隨。鋼鐵本身係循環性行業，價格跟起落循環波動，利潤波動大，O依家大氣候無論係內地汽車業，以至國際貿易環境，對呢個板塊唔係太有利，所以估值雖然低，撈底都要小心。
水泥鋼鐵無事打三錘
同鋼鐵有啲相似嘅就係水泥股。水泥股早排公佈業績唔錯，但股價上唔到，呢個星期就掉頭向下。今年上半年水泥行業續好，下半年行業仍然對維持價格有信心，主要係內地加強環境監管，對維持整體供應平衡有利。呢一輪水泥股回調咁急，有啲股價走喺行業之前，相信亦係擔心未來政府可能會出手，加上水泥價格高位運行咗好耐，有可能出現調整。海螺水泥(914) 再挫3.9%，收報41.75元；金隅(2009) 再創52周低位，低見2.45元，收跌3.5%，報2.49元；中建材(3323) 跌2.75%，收報6.37元。
有中環茶友手持中國建材(3323) ，用來高沽低揸。中國建材早前公佈中期業績，整體盈利升1.4倍，雖然併購攤薄每股盈利，但都有0.45元人民幣。業績雖然對辦，但股價無力上升，呢個星期插落今年新低。茶友估計，呢個走勢反映市場調低呢類循環性股價的估值，雖然以估值同息率計幾吸引，但都唔敢加倉溝淡，皆因弱市之下，無事都會被人打三錘，有事就直情會內傷。
陸羽仁
金融High Tea 舊文
來源 source: http://hdfin.stheadline.com