智取大市：美團市值的迷思 - 晉佳
美團市值大概4,000億，以其客戶基礎同服務範圍，要大幅提升變現能力，也許不易。資料圖片
中港股連日洗倉潮，去到星期三跌市當日，公用股、本地電訊股之類，全線向上突破，即市避險情緒到達頂點。結果噚日，港股就出現報復式反彈，當然中美再埋枱傾好似係好消息
，但絕地反彈絕對要超賣狀況嚟配合。
噚日進入短期雞犬皆彈，難以判斷反彈延續性，亦難以從單日走勢上辨別股份未來強弱。反而回顧之前一段日子，如果有股份有壞消息而冇被洗倉，或許被視為市場惜售嘅股份，可見將來會偏強。
美團（3690）同小米（1810）差唔多，市值大概4,000億，以佢嘅客戶基礎同服務範圍，要大幅提升變現能力，喺旅遊業務表現停滯情況嚟睇，也許不易。而美國上市京東市值亦只係低於美團、小米些少。佢哋共通點係有Niche之餘，喺中國某個界別擁有以億計客戶數字，有收入模式但盈利增長方程式未確立，若成功提升變現能力，每年盈利過百億計，就可以支撐更高市值，京東就做極都做唔到了。
亞馬遜多年來都想進軍藥品銷售，可知潛力龐大。睇內地線上醫療搞到一劈屎，但阿里健康（241）背靠天貓，加上餓了麼團隊，暫時唔撈醫、只撈藥似乎係出路，收入模式剛起步，市值724億，相對美團之類，似乎更有潛力。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com