油股打亂章有胡食
2018年09月14日
美國一聲話重開貿易談判，港股喺連跌六日後，出現報復式反彈，大市全日急升669點。前一日美國總統特朗普仲係態度強硬，又傳話會制裁中國官員，突然間轉態，認真係估佢唔到，特朗普如果炒股，肯定佢會成為專殺散戶的大贏家。
喺大升市之中，
石油股表現尤其突出，油價升破80美元關，中國海洋石油(883) 爆上一年高位，尾市再升高，結果全日收市報14.72元，再升4%，中石油(857) 昨日除息，收升5%，報5.94元，跑贏一眾藍籌；中石化(386) 升2%，報7.68元。石油板塊係陸羽仁今年少數看好的板塊，中午飲茶時有茶友問，油股係咪可以揸，又話點解呢次油股炒上，石油設備股明顯落後呢？
油服股炒落後
對於油市前景，陸羽仁算係溫和樂觀派。O依家全球睇油有兩個相反方向，一個係悲觀派，主要係全球視使用化石燃料如畏途，各國定出使用電動車時間表，所以連沙特阿拉伯，都想將國有石油公司上市。
樂觀派就覺得新能源要取代石化能源，仲有一條相當長嘅路要走，石油需求唔會咁快大跌，中短期而言，美國11月開始制裁伊朗，沙特又想推動油組減產為沙特阿美公司上市鋪路，令油價有支持。
市場對油價睇法分歧，當中都包含特朗普因素，佢一方面係舊經濟人，對新能源唔支持，做法同上任總統奧巴馬相反，所以佢一上任，新能源股就無運行。
同一時間，特朗普又覺得高油價不利選民支持佢，打開口牌唱低油價；加上特朗普發動貿易戰，影響經濟和石油需求，呢啲矛盾言行猶如打亂章，令參與牌局的油公司同投資者眼花繚亂。不過，如果撥開這些表象，油價喺現水平應該有相當好的支持，若然唔係有特朗普因素，甚至可能仲會高番10元8塊美元。
講到石油設備股追唔上油股，一來係油市被不同因素纏繞，睇得唔係咁清，特別係貿易戰困擾，連油公司對加大鑽油投資，都可能受全球經濟不明朗影響。
就市場因素來說，石油設備服務股唔係大板塊，相關公司規模同耐震能力都不及石油股。
喺大市風險胃納下降，資金流入大股的大氣候下，石油設備股自然炒味欠奉，之前好多隻都跌近一年低位。
但睇番飲完茶下午開市，內地上證指數終止三連跌，收市升超過1%，創半個月來最大單日升幅。天然氣、油氣板塊爆上，帶動股指再度轉強，香港的石油服務股升幅都開始擴大，巨濤(3303) 升13%，報1.07元；華油能源(1251) 報0.58元，升11.5%；中石化油服(1033) 升4%，收1元，甚有跟炒落後味道。
貿戰難測買要等沽未急
美國邀請中國進行新一輪貿易談判，港股連跌六日後反彈。恒指升幅略為收窄；下午升幅擴大，恒指收報27014點，飆669點。
中美貿易談判重新啟動，是否傾得成難以預料，但就拖住2000億美元制裁暫不執行。
今次係美國主動作出邀請兼爆料，理論上氣氛應該好啲，只不過美國中期選舉要等到11月，距離O依家仲有一段時間，如果指數彈番千零點，咁O依家可能已經行咗一半。如果無買貨可能就要等下個機會，低位撈咗貨者，就未需要咁心急食胡住。
陸羽仁
金融High Tea 舊文
來源 source: http://hdfin.stheadline.com