【魚樂無窮】中電見紅底 唔係好事（唐牛）
久遺了的反彈終於出現，仲要係大大力，由頭挾到尾，恒指埋單重上27000大關。難得反手挾倉，相信唔會一日完結，一來好友已經等咗呢個機會好耐，二來淡友也會食糊平倉，雙重動力不可睇小。七孔流血還七孔流血，死還死，係兩碼子的事，同一道理，反彈還反彈，絕不
可以將之與轉勢相提並論，始終今次用嘅藉口只係中美雙方就貿易戰再次談判，傾成點冇人知道，傾幾耐亦估唔到，與其憧憬港股完成跌浪，不如趁大市回勇減磅套回現金吧，鍾意候高造淡的，不妨等到見頂訊號出現才出手，順勢而行。
公用股中電（002）成為熊市的牛股，近日屢創新高，直逼紅底水平。公司昨晚發通告，將旗下中電印度40%股權售予基金CDPQ，作價264億盧比（約28.9億港元），交易完成後，中電將繼續持有中電印度60%股權。
股價走勢如何今日才知，市場卻已憧憬中電可升至紅底水平，不過，以周息率計，假若中電見99元，股息率將跌至3厘，意味若股價見100元，股息率更會見2字頭，試問一隻公用股，股息率3厘唔夠，還算是公用股嗎？避險資金也識計數的，唔買中電可以買煤氣（003），所以，中電見紅底唔係好事，好大機會係見頂指標！
唐牛fb專頁
http://www.fb.com/tongcow88
魚樂無窮 - 唐牛 舊文
來源 source: http://hk.finance.yahoo.com