一路一帶 - 斯郎 2018年9月6日
一路一帶：點解仲倒錢落海 - 斯郎
買劏房、劏工房係買唔起樓嘅另類選擇，但呢種選擇同倒錢落海冇分別。 資料圖片
最近有單新聞，有「苦主」買了個256萬元，只得292呎的工廈劏房單位，筆者認為該位苦主，其實係冇做功課，過程可能有人隱瞞違規或涉及誤導等等，但點解政府對工廈劏房呢類納米樓，卻無監管呢？
香港人有股「樓奴癮」，尤其過去幾年樓價升幅驚人，冇買騰訊（700），又冇買樓嘅港人，彷似「人生輸家」，市區新樓呎價動輒近兩萬，郊區都要1.5萬，入場門檻低嘅劏房、劏工房，就係買唔起樓嘅另類選擇，但呢種選擇同倒錢落海冇分別。幾年前，商場劏舖拆售，已令一眾投資者損手爛腳，新聞見得多，但肯睇嘅人又有幾多？
可能磚頭嘅吸引力實在太過驚人，過去幾年只要上到車，99%都贏到錢，由於往績實在太靚仔，樓點買都實賺，呢個心態遇上𠵱家嘅市況，就係中伏嘅開始。無論加息、新興貨幣市場危機定貿易戰，要炒樓絕對係最差嘅時機。
後記：新居屋有十幾萬份申請表，好多後生仔，無論係剛畢業嘅新鮮人，定係做咗幾年嘢嘅「月光族」都去抽，抽中點？問人借囉！所以買劏房中伏嘅人，同呢班月光族一樣……至於係咩形容詞，留返各位自行填充。
斯郎
http://fb.com/oneroadonebelt/
一路一帶 - 斯郎 舊文
來源 source: http://hk.finance.appledaily.com