雙鬼拍門嘔晒血
2018年09月06日
港股經過一輪成交收縮，買賣雙方決出勝負，喺貿易戰加匯率風暴雙鬼拍門下，恒指大插729點，要留意嘅係，跌風捲向地產股。
美國有可能喺今個星期，公佈新一輪針對2000億美元中國貨徵稅措施，喺美國單邊主義威脅，加上美元上升，新興市場貨幣
風聲鶴唳。印度盧比今年本來已經弱勢，經過一輪吹襲後，匯率跌至歷史最低點；加入技術上陷入衰退的南非，蘭特延續昨日跌幅，單日大跌1.7%；連同土耳其里拉不振，憂慮擴散至股市。亞洲交易時段新興市場股指全面走低，印尼股指昨日創出兩年來最大單日跌幅，消息傳來有主力投資新興市場的基金公司，旗下產品錄得不菲損失。
大行唱淡有「騰」無「訊」
雙鬼拍門拍到中港股市都嘔晒血，內地股市全線下滑，午後跌幅擴大，上證指數收報2704點，急跌46點，跌幅1.7%；深成指數收報8402點，大挫151點。港股亦愈跌愈急，恒指低開跌184點，原來只係前菜，中午收市已跌近400點，下午跌勢加劇，收報27243點，急挫729點，跌幅2.6%，多過內地股市；國企指數收報10645點，下滑244點，成交952億元。睇怕大市要等到2000億制裁生效先跌定。
上個月上市的中國鐵塔(788) 上午重挫，一度插穿一元水平，收市挫6.4%，收報1.03元。舜宇(2382) 大瀉6.39%，收報93.8元，為跌幅最大藍籌股。周初反彈的騰訊(700) 大挫逾4%，收報324.8元。股王變了有「騰」雞，無喜「訊」，俾大行繼續唱淡，花旗調低第三季盈利預測，但維持評級目標價420元不變。
花旗認為，新遊戲發佈的時間和規模方面的不確定性，依然令人擔憂，該行下調對騰訊今年第三季收入及非通用會計準則純利預測，分別1.9%及6.9%，預測騰訊第三季手遊收入，可能按年降5.5%，按季下降2%，至172億人民幣。今年手遊收入預期僅按年增長19%，至746億人民幣，遊戲收入放緩可能會持續多個季度，業務毛利率亦可能降低。總之股王一沉百踩，之前聽大行講高追者，如今應該後悔莫及。
P息或升股價跌定先
大跌市中，本港地產股沽壓都幾大，幾隻龍頭地產股都創咗一年新低，長實(1113) 跌3.3%，收報56.25元；新地(016) 跌3.6%，報111.3元；恒基(012) 跌2.5%，報39.75元。其他地產股方面，會德豐(020) 下滑2.3%，收報48.15元；嘉里建設(683) 降2.4%，收報28.4元，同創一年低位。
地產股弱勢，相信係因為拆息連日上升，加埋今個月美國議息，有機會調升利率，屆時港元有可能多年來首度調升最優惠利率(P息)。由於本地企業同供樓人士習慣咗超低息多年，最優惠利率調升，好可能帶來幾大心理衝擊，所以地產股率先回落。
中港股市被雙鬼拍門，陸羽仁講過，新興市場風暴，其實係美國「息鬼」作怪，美息向上，加埋量化寬鬆告一段落，央行縮表減少水源，令資金退出新興市場，所以美國經濟榮景未停，美息上升未止，貨幣風暴唔會咁易吹完。
若然睇番全球大勢，喺美國大水漫灌下，各地樓市紛紛上漲，就算一向「地大物博」的加拿大同澳洲，兩地樓價都狂升。不過，隨著美國收水，呢啲地區樓價開始放緩，唯獨香港仲係持續發飆，但呢個人跌我升嘅局面，又可以維持幾耐呢？
從近日樓市出現兩極化，部份新樓特色盤繼續創新高，但二手已經出現成交萎縮，更加錄得減價成交，似乎升浪已經出現最後一頂小浪花。喺呢個環境下，龍頭地產股紛紛創一年新低，似乎都係跌得有道理。
陸羽仁
金融High Tea 舊文
來源 source: http://hdfin.stheadline.com