組合拳再下一城
2018年09月20日
中央同美國佬過招，除左放水喺股市護盤，組合拳連環出招，發改委公佈加快基建投資，拉動內地需求。內地股市再下一城升1.1%，港股同步再升322點，基本上收回美國宣佈徵稅細則前失地。
發改委出招谷高基建股
中國同美國招來招往，令人
睇到有啲眼花繚亂。中環茶友話，美國無叫停徵稅，但減低左稅率至10%，阿爺亦堅持反制，稅率尚算克制，咁究竟應該如何解讀，到底係好消息抑或壞消息呢？
中美兩國先後出招還招，當然唔可以話係好消息，但雙方力度比想像中略細，我同茶友話，照O依家咁嘅情況，中美就算繼續接觸，都唔好預期喺11月美國中期選舉前可以達成協議，若然有突破咁就係意外驚喜，傾唔成係意料中事，咁大家就要適應加稅後的貿易環境，美國消費者要買貴啲嘢，中國長線就面對低端產業加快流失影響，地球就係咁運轉落去。
茶友問，咁消息係咪已經消化，或者股市已經見底呢？呢樣嘢陸羽仁無水晶球答唔到，但主要睇內地個市頂唔頂得住。阿爺選擇得同美國互徵關稅，看來都做咗一定準備，減低短期震盪。好似發改委適時公佈會加快基建投資，同時又傳中央會研究擴大退稅，減緩出口企業受到的壓力，幫佢地渡過難關。
中央各種措施配合，應該有助減低衝擊，如果股市跌得急，相信中央出招會加快，加大支持力度。國務院總理李克強在天津夏季達沃斯論壇大派定心丸，提到中國經濟上半年增長6.8%，是連續12季保持在6.7至6.9%中高速區間，認為中國經濟保持穩中向好，強調雖然國際經貿有明顯變化，中國不可避免受影響，經濟平穩運行難度加大，但中國有保持經濟穩中向好決心及信心。
美股三重結 北風影響增
發改委谷基建消息，令基建關連股份開市造好，鐵路同水泥股紛紛上升。水泥股由於傳出加價消息，升幅優於大市，由於近日累積反彈不少，午後升幅略為收窄。中國建築(3311) 大升6%，收8.36元；亞洲水泥(743) 升逾3%，收報7.82元；海螺水泥(914) 升2%，報46.2元。基建股以中鐵建(1186) 升2.6%，報10.28元較為出色。
水泥股早前因為有說法中央派官員去巡視，市場擔心會有限價措施，令水泥股被洗倉式下插，但隨後水泥股已經轉穩。水泥股受惠中央供給側改革，供應減少，產品有加價能力，推動盈利上升。只係水泥屬周期性行業，升得咁上下就會引來供應上升，觸發調整，加上產品價格若太高會起政府關注，所以估值不會太高，買貨要留意唔好高追。
喺中央組合拳迎抗關稅衝擊下，港股裂口高開接近27200點，雖然早段曾經幾乎打回原形，但A股再度發力，帶動港股再度回升，恒指收報27407點，上揚322點；國企指數跑贏大市，收報10741點，漲184點，成交964億元。中資股表現好啲，平保(2318) 升左2%，收報77.15元，再見近期高位；銀娛(027) 急升3.2%，收報52.8元；三桶油繼續強勁，中石油(857) 升2%，收報6.17元，油服股升幅更大，華油(1251) 、海隆(1623) 、安東(3337) 升幅都超過7%。
人民幣回穩，連帶內房造好，多隻股份抽升，萬科(2202) 收漲6%，報27元；中海外(688) 收升5.5%，報25.05元；華潤置地(1109) 收漲4.6%，報28.4元。
呢個星期五美股三重期結算，估計大戶會力托美股製造一個安全期，所以港股都會繼續受北風影響。
陸羽仁
金融High Tea 舊文
來源 source: http://hdfin.stheadline.com