異動空間 - 魏力 2018年10月19日
異動空間：逆向解讀最靠譜 - 魏力
中證監主席劉士余話股市「離春天不遠」，不過近排每逢官方出口術維穩，個市就跌得仲甘。 資料圖片 適中字型 較大字型
記得本周初，阿爺跌到四腳朝天，報道話是擔心被美國列入滙率操縱國。結果「大步檻過」，但A股仲係瀉到唔識停，中證監主席劉士余話股市「離春天不遠」，無錯，捱埋霜降、立冬、小雪、大雪、冬至、小寒、大寒，之後就到立春，但問題係：捱得過至得㗎（特別係重債企業）！戰友可能留意到，近排每逢官方出口術維穩，個市就跌得仲甘，一來大家都曉得「逆向解讀」（例如貿戰悲觀論「不靠譜」即是十分靠譜），二來越多口水，即係越少實質救市動作，習慣一跌就救的A股股民，當然越來越恐慌。
宏觀來睇，大陸經濟目前「十個煲，三個蓋」，滙市、樓市、債市、股市樣樣要救，總不能四線同步進行，要分緩急輕重，A股兩融（孖展、沽空）餘額跌穿8,000億人仔，創近四年新低，意味萬一爆鑊，相對於前三者，損失都係有限數，阿爺懶理A股死活，港股也難望大反攻。
美股方面，特朗普近日喪鬧聯儲局加息過急，一來將冧市隻鑊卸落儲局，二來想壓住美元，等中期選舉前個市唔好太肉酸，但觀乎美股近日即市大起大落，反映投資者信心變得脆弱，中線也難免跟全球股市「同步過冬」。金價近日開始擺脫美元左右，逐步上攻，都是避險意欲升溫的體現。
魏力
http://fb.com/2012jason
本欄逢周一、五刊出
異動空間 - 魏力 舊文
來源 source: http://hk.finance.appledaily.com