息魔打散科技股
2018年10月12日
美國科技股急跌，杜指急插831點，變成踩多港股一腳。恒指終止六連跌微彈一日，昨日一度大插過千點，去到25000點邊緣。尾市人仔匯價回穩，大市跌幅稍為收窄。
美國科技股呢次掀起跌浪，同聯邦儲備局主席鮑威爾提到加息步伐未定，其實有看不到的關係。息口向上，資金成本
增加，同時產生壓抑經濟效果，對於增長型的科技股估值不利。所以科技股喺鮑威爾放鷹後，開始周身唔聚財，終於喺昨日納指跌得慘烈，收報7422點，勁跌超過4%。五大科技股FAANG跌幅都超過4%，Google母公司Alphabet跌逾5%，亞馬遜跌逾16%，Netflix亦大跌8.4%。
利率攀升不利增長股
同美國科技股相比，股王騰訊(700) 單睇昨日，或者有人覺得唔算太慘烈，但再創一年半低位，收報267元，挫6.8%，收報269.6元。如果以高位476元計，足足跌咗200大元，幅度達43%。以一隻萬億市值大股嚟講，如此表現實在非常驚人。呢一浸佢由300元破關而下，下插速度同幅度都極快，好似昨日單日插16.8元，近排入貨者好多都已經成手血。
息魔威脅下，科技股喺跌市中特別傷，皆因市場風險胃納大減，避險意識增加。喺利息上升下，部份資金逃離股市，部份就轉入有護城河防守的收息股，科技股同高估值股份因而被拋售。騰訊就再多咗業務前景不明朗因素。本來騰訊大力投資其他科網公司，部份準備分拆，製造帳面增值之餘，同時減輕公司燒錢壓力，但O依家個別公司好似鬥魚話上市計劃可能押後，投資者視線就落咗喺公司財政負擔，股價下跌變成滾雪球效應，令佢傷上加傷。
由科技股觸發美股大跌、美股大跌觸發包括中港的亞洲股市大跌。受隔晚杜指急瀉逾800點拖累，上證指數午後跌幅擴大至逾5%，失守2600點關，創2016年1月來新低。上證指數收報2583點，急瀉142點或5.22%；創逾31個月最大單日跌幅，過千隻股份跌停板。深成指數收報7524點，重挫486點或6.07%。其他股市表現較佳，日經平均指數收報23590點，挫915點或3.9%，澳洲標普ASX 200指數收報5883點，跌166點或2.7%。
港交所傷 新股更傷
恒指受外圍影響，裂口低開800點後，早段收窄跌幅至755點，半日高位曾見25438點，其後A股跌穿2016年初熔斷低位，跌幅擴大逾千點，低見25159點，創近17個月低位。恒指收報25266點，下瀉926點或3.54%；國指曾跌穿10000點大關，收報10092點，急跌350點或3.35%，成交金額1397億。科技股唔掂，美團點評(3690) 喺大成交下急瀉10%，收報62元。金蝶(268) 瀉8.6%，收報6.81元；金山軟件(3888) 挫7%，收報12.08元；美圖(1357) 收挫9%，報4.67元。手機股捱沽，瑞聲(2018) 挫7.3%，收報69.95元，為表現最差藍籌股。
港交所(388) 急挫5.8%，跌穿200元大關，收報196.7元。喺大跌市下，新股贛鋒鋰業(1772) 首掛，股價收報11.76元，較上市價16.5元，跌4.74元或28.73%，高低位曾見15.3元及11.06元，成交4078.31萬股，涉資5.4億元。中籤者一下就損晒手，由入紙到掛牌幾日間市況插咗二、三千點，呢啲就係市況不明朗下抽新股嘅風險，所以唔單止新股跌得勁，連靠新股食胡的港交所都插得勁過大市。
喺股市風起雲湧下，人仔一度受壓，中間價連續第八日下跌，續創逾年半低，其後離岸人民幣兌美元抹去跌幅，短線漲200點，而即期收市跌74點子，報6.9268兌1美元。美國中期選舉在下月6號舉行，美股此時急跌，令人擔心除了經濟因素外，還有政治因素，係呢種市況，都係小心為上。
陸羽仁
金融High Tea 舊文
來源 source: http://hdfin.stheadline.com