貼地風管 - 鄭發 2018年11月26日
貼地風管：實戰投資 戒六陋習 - 鄭發
投資和打交一樣，必須透過不停鍛鍊和實戰才會成功，同時要戒掉6個惡習。 資料圖片 適中字型 較大字型
想像同人打交，但你懶得操體能、唔學招式、唔拉筋；臨場仲要唔熱身、闔埋雙眼、任由旁邊專家叫你出左拳踢右腿，你就照跟無疑。咁都唔死得，係家山有福！可怕的是，好多人投資時，正正就係咁，只聽財演講number照跟。
每個人的經歷、性格、膽色、財務狀況、金融知識各有不同，無可能有一項投資能夠適合任何人。認真唔一定贏錢，但一定贏到經驗。坊間有很多有關投資致富的書籍，希望讀者要明白這類書籍的作用是讓你振奮，充滿希望地去投資。希望年輕人不要怕煩、怕悶、怕深，要讀嚴謹一點講財務分析、風險管理和金融歷史嘅書。
投資和打交一樣，必須透過不停鍛鍊和實戰才會成功，同時要戒掉以下惡習：
1）贏就興奮、輸就無癮：市旺時，跟風入市，起初贏錢就覺得自己好掂！但之後個市開始回，就將股票收埋不理，直至下次市旺又重複犯錯！
2）未賣當未輸：很多人不願賣出虧本的投資，覺得未賣就未算輸。反而贏錢嘅投資就想賣掉，覺得咁先算落袋。這惡習容易導致贏粒糖輸間廠！
3）把朋友當專家：身邊總有些朋友喜歡作大，買中隻股票就周圍曬命，買錯就當無發生過。跟他買，後來輸錢仲要俾人怨「搭沉船」！
4）貪小便宜：如果因為超市禮券而亂買投資產品，除了輸錢還會輸面。不要以為自己一定不會犯這錯誤──我到現在仍然有這毛病！其實不是真的貪那一千幾百，而是因為投資往往心大心細，禮券和回贈能推你一把，但這是完全不理性的行為。
5）投資當買衫：很多人投資心態像買衫，喜歡等股票跌幾個價位才覺得抵買；股價唔跌就好似店主唔肯減價咁，點都唔肯買。
6）被動式投資：sales遊說買掛鈎產品時，說可收多一點利息，萬一要接貨也可用低價買貨。買掛鈎產品是沽出期權，收取期權金，代價是贏無你份，輸就你找數！可能真係有人唔明，但其實很多人只是扮唔明，因為過不了「未賣當未輸」、「貪小便宜」和「投資當買衫」這些心魔。
上周提到要努力尋找工作的至愛。但朋友說投資並非他所愛，我解釋：投資唔同，你嘅錢就等於你嘅仔女，無得揀，鍾唔鍾意都要好好照顧。
現實非常殘酷，有人贏就有人輸，只能希望自己多點機會站在贏方，想次次贏嘅人多數輸鑊金！
足本版請見「貼地風管」fb專頁
鄭發
本欄逢周一刊出
貼地風管 - 鄭發 舊文
來源 source: http://hk.finance.appledaily.com