財路 - 錢雋 2018年11月27日
財路：越秀地產殘爆有得諗 - 錢雋
越秀集𦬅董事長張招興（中）及越秀地產董事長林昭遠（右）。 資料圖片 適中字型 較大字型
今年內房企業喺傳統所謂金九銀十內房大旺時節，冷清收場，場內越秀地產（123）脫穎而出，10月銷售彈出，有得諗嚇。
今年10月，越秀連合營項目合同銷售額，達到81.2億元人仔，同比大增156%，銷售面積近33萬平方米，同比增幅亦翻一番樓上。又計今年頭十個月，集團累計銷售額439億元人仔，已經完成今年目標80%，靚仔到痹。
又今年以嚟，喺內地持續政策緊縮下，總體內房銷情麻麻地，有擔心嚟緊日子，內房硬著陸。但咁睇，資本瓣數當中，A股已經貼曬地，若果內房爆破埋，內地經濟復元更需時，所以，估計內地會適度調整緊縮政策，內房有望向上彈。而美銀美林亦發報告話，大部份發展商同專家都認為，內房政策風險已見頂，係睇阿爺明年初或者幾時鬆手。
講番越秀，集團對口係廣州市屬越秀集團，牌頭夠曬照，而越秀單到今年6月為止，仲有560億元已售未入賬金額，連埋預售超過400億元人仔，保守啲計，亦可以安全過渡橫風橫雨期。
場內專業預測，集團今、明兩年預測PE 0.24元同0.27元，越秀現價1.40元，比今年3月高位1.94元累跌39%，兩年預測PE得番5.8倍同5倍。又仲吸引係，越秀今、明兩年專業預估PB 0.4倍，呢個水位，同之前金融海嘯期水平，已經差冇幾，越秀殘到爆。
越秀有調整，見跌到落短線橫行支持1.3元細細注，明年預測PE上番家陣6.3倍，都講緊要升34%到1.74元，有魚有肉。
錢雋
細價股專家
本欄逢周二刊出
財路 - 錢雋 舊文
來源 source: http://hk.finance.appledaily.com