金手指 - 孫柏文 2018年11月27日
金手指 ：勿撈「軟脫歐」概念 - 孫柏文
大家不妨做定淡倉，買英國「硬脫歐」。
資料圖片 適中字型 較大字型
五個禮拜前，西洋傳媒將注意力放喺沙地前建制中人兼西報專欄作家Khashoggi被碎屍案時，孫柏文寫咗篇題為「打直行入斬件運出」去分析。裏面我話過呢單嘢會令沙地皇儲MBS更要靠侵侵，要落實佢嘅政策目標。而侵侵中東政策得二，打爆ISIS同埋隊冧油價。ISIS就近乎消失。油價呢？
我篇文出街嗰日，布蘭特石油賣80蚊桶，我落筆呢刻就已跌穿60蚊。所以要知最準嘅國際政治形勢分析，睇《蘋果》最快最準，贏曬全球英文傳媒。
周日，新聞話歐盟同英政府為脫歐達成協議。我就見華文傳媒開始話要買「軟脫歐」概念股。幾個禮拜前，我哋獅子會學會接待咗個英國保守黨歐洲議會議員。
咁當日就有人問佢，脫歐單嘢會「硬脫」定「軟脫」。佢話：「百分百有信心歐盟同英政府一定會達成協議。不過亦百分百有信心，首相攞乜叉協議番英國國會，都會唔夠票通過。所以英國會硬脫歐。」
佢咁講，都係確定咗我之前嘅諗法。今日見世界一片「軟脫」希望中，叫大家做定淡倉，買「硬脫」。
講真，歐盟擺到明想玩死英國佬。佢哋嘅協議，基本上迫英國實際上同之前係歐盟成員冇分別。唯一唔同就係，一，喪失改歐盟條例能力；二，冇歐盟同意下冇得再脫歐；三，直布羅陀可能要畀返西班牙。簡直係喪權辱國。英國作為民主搖籃，如果呢啲條款國會都會接受，佢哋真係玩完。即係英鎊都係玩完。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.finance.appledaily.com