金手指 - 孫柏文 2018年12月11日
金手指：黃子華都係搵食啫 - 孫柏文
黃子華反對買門票實名制，不過又繼續話政府要做啲嘢，至於啲咩，冇講，話要多啲研究喎。 資料圖片 適中字型 較大字型
今年四月見黃子華自拍，話佢（又再）最尾一次表演嘅門票，因未開售已賣曬兼出現炒價，所以好似陳婉嫻上身咁，要政府「做啲嘢」。
佢一嘈，即時收到佢想見到嘅效果，就係佢個show變城中熱話，令門票大賣兼開多幾場，賺到喊。錢都買唔到嘅marketing呀。
點都好，黃牛黨擔當重要嘅社會角色。多唔好講，個暑假show喺四月開售。有幾多個香港人，可以confirm自己喺幾個月後嘅某一晚喺香港兼得閒？時間值錢，對香港人來講，自己個時間表有彈性更值錢。黃牛黨賺嘅，就係提供呢個彈性畀你。
而最冇人講，就係最終黃子華將演出量化寬鬆，去到最後啲黃牛黨有部份手上門票，蝕讓。
咁充斥住填鴨式教育洗腦受害者嘅香港中，就好多滿口「原則」嘅cheap精舉腳贊成要杜絕炒家，黃牛黨要嚴打。而一個又一個會考30分嘅人（即係做政務官或中大讀Journo級數嗰啲勁人），話杜絕炒家好易，實名制就得。
點知，股壇長毛David Webb即警告，話實名制一但落實，你搵鬼睇「六四故事」等嘅表演。我一睇Webb咁講，更令我明點解啲政務官級數高分嘅人，支持實名制，因為此舉極有效，不過同時確低能。香港is dying，就係因太多填鴨式教育產物做KOL同記者。
前日，我見到黃子華出來反對實名制，不過又繼續話政府要做啲嘢，至於啲咩，冇講，話要多啲研究喎。憑佢呢句，我覺得黃子華唔從政嘥曬。仲要唔係選立法會，而係佢隻口吻已達啲局長級數。而做唔到，或更有可能就係做咗，點知反效果係更進一步做死香港content工業，冇事。因局長係問責制，唔係負責制。未來，用納稅人血汗錢，補貼棟篤笑業界持份者，職訓局開班，就得啦。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.finance.appledaily.com