資產股 炒一浸
2018年12月05日
港股周初借住中美達成協議爆上，隔晚美股續升，港股開市有回吐，但暫時仍然跌唔到落去。美國總統特朗普係Twitter猛煲同習主席會面有成果，形容：「中美關係是大躍進，非常好的事情將會發生。」佢吹到咁好，都對個市都有正面作用。
大市
拒絕調整，既因為對中美最終能達成協議期望升溫，另外亦因為上市公司動作多。老牌公司合和(054) 周初停牌，估計係公司考慮私有化。合和停牌前報26.45元，市值逾229億元，若落實私有化計劃，料大股東須掏至少150億元收購街貨。
大股東要食合和肥肉考功夫
牌面睇，合和市值230億元，市帳率為0.44倍，即係話帳上資產淨值高達522億元，變相目前市值較資產值有56%大折讓。不過呢個係會計上嘅數字，帳上資產價值未估到足，實際合和靚資產唔少，單係灣仔幾幢旗艦物業，相信已超過呢522億嘅帳上資產淨值，而且合和呢啲物業業權完整， o依家喺港島區一件難求。
合和要私有化，有兩條數要計，一條係錢從何來，皆因合和街外流通股份唔少，大股東若然私有化，要拎出嚟嘅銀紙唔少。以合和資產，私有化後可以賣點家當減債，條數應該唔難解決。若然成功，咁就相當肥仔，但問題亦在於小股東如果覺得公司資產品靚，咁又會唔會咁易放手呢？所以訂價係一個問題。
前兩個月陸羽仁同位中型發展商傾偈，話題係佢公司資產大超值，點解唔私有化呢？佢嘅答案係o依家要私有化難關重重，實在太難諗。合和o依家面對嘅問題一樣。過去五年嘅合和股價，最高造31元，而事實上，合和自上市以來，股價最高亦只係93年12月底一度升至32.573元；該公司98年11月股份五合一，以此計算，當年高峰期股價以後來五合一後來計，即係最高價去過162.865元。表面上數係咁樣計，小股東如果賣股要蝕錢就寧願死坐，點樣說服小股東離場，喺現時情況絕對唔易，合和能否搵到聰明腦袋解決，正係食肥肉嘅關鍵。
小股東拒絕私有化，有時係大股東計數得太盡，有時係自己太天真，一個例子係電盈(008) ，八號仔係18年前科網股泡沫時炒到天價，早幾年大股東想私有化，本來出價唔算太低，但小股東因為蝕得太多，加上有啲正義之士出嚟大聲疾呼，結果不但搞到私有化失敗，幫手度橋的師爺仲變得灰頭土臉，引為憾事。現在事隔多年，八號仔股價唔見得有暴升，當日若然接受私有化，小股東以高於當時市價套現買過其他股票，可能除笨有精。
小股東是否接受私有化，若然公司係搞業務經營，條數難計啲，若然公司有資產，咁就要秤身家。如果無着數，大股東當然唔肯冒險出招出手，但如果太大貪，出價太低，咁小股東就未必肯投降，尤其係基金股東都識計數，好多時就成左右大局嘅作用。
川河出手低料難成功
合和私有化前途未卜，但資產股就即刻有反應。出名多資產嘅先施(244) 股價即時急升，收漲17%，報0.177元。公司o依家連殼市值只係1.6億元，真係一陣風就吹起股價。另一邊廂，川河集團公佈，大股東湯氏家族提出以每股0.55元私有化，則要約之價值約為10.06億元。川河股價急升後回落，收報0.58元，升咗5.5%，似乎有人博佢加價。川河主要係控股性質，本身無乜獨立上市價值，但以市值私有化，相信都幾難成功，所以係呢個水位炒佢都係博一舖。
由於好多私有化都係要揀股價低殘時候，現時股市大跌，資產折讓大嘅公司通街係，呢類股份風險相對低，於是合和同川河都出手，市場借此掀起一陣炒作風都唔奇。
恒指噚日先跌後升，收報27260，升78點；國企指數收報10907，漲25點，成交927億元。好多大股仲繼續有小小進帳，騰訊(700) 升逾1%，收報328.4元；港交所(00388) 上揚2%。華潤置地(1109) 首席執行官吳向東傳離任，股價收跌1.15%，報30.15元；舜宇(2382) 收挫2%，造79.8元，係跌幅最大藍籌股。
特朗普周一喺社交媒體稱，中國已同意降低同取消美國輸華汽車嘅關稅，汽車股表現兩極。吉利(175) 收跌0.6%，報15.74元；廣汽(2238) 收跌0.12%，報8.38元。相反，北汽(1958) 收飆5.8%，報4.95元；華晨(1114) 收升3%，報7.18元。
陸羽仁
金融High Tea 舊文
來源 source: http://hdfin.stheadline.com