Can Bank - 散子 2019年1月15日
Can Bank：穩定地再堅持一會 - 散子
李澤鉅上場近一年未見有大動作，除非有大型併購或宏觀經濟環境改善，否則持有長和係股票嘅朋友都要再守一會。資料圖片 適中字型 較大字型
市況波動，散子不少朋友近幾個月都無入市，只係揸住幾隻長揸股份，靜觀其變。唔少朋友都話長揸長和系內公司，幾年都無乜賺錢，其中最差嘅係長和（001），揸住三年都要輸錢，表現最好嘅係長實集團（1113）。
長實始終揸住唔少香港物業，近期幾年地產市道大家有眼睇，跟個市升都好正常。反而長和近兩年核心盈利缺乏增長，加上英國脫歐令英鎊滙價波動，股價表現相對較弱。同系長建（1038）自從與電能（006）合併未能成事之後，都面對同一個問題，小股東只能靠相對穩定嘅股息堅持落去。
李澤鉅舊年坐正，至今仍未有大動作，佢在上個禮拜五晚周年晚會上首次以主席身份致辭，內容罕有地謙虛，希望同事可以提點同支持。你或者會覺得呢個係門面功夫，但亦有可能係坐正之後，面對老臣子時有唔少阻力。與其他家族企業一樣，新一輩上場後，總不可能一上任就嚟一個大清洗，所以贏得老臣子嘅支持先至係明智之舉。
李澤鉅上場近一年都未見有跳出業務框架嘅大動作，除非有大型併購或宏觀經濟環境改善，否則幾個上市公司核心盈利都難以大增長，持有嘅朋友看來都要再守一會。
散子
http://fb.com/ 散子-257101397966975
Can Bank - 散子 舊文
來源 source: http://hk.finance.appledaily.com