大棋局 - Mr. Tregunter 2019年1月15日
大棋局：A股還有得救嗎？ - Mr. Tregunter
有中國特色的股市是牛短熊長，長期熊市，突然爆一下牛市，發一聲就完。A股要有救，只有開放。資料圖片 適中字型 較大字型
企業借錢做生意，分為間接金融及直接金融。問銀行借錢，係間接金融；自己發行債券、股票等問市場借錢，係直接金融。據國際清算銀行數據，中國債券市場規模世界第三，但只有美國四份之一。A股則長期一池死水。中國金融制度落後之處，或說一個癥結，就係太過依重於間接金融，而銀行又不太願意借錢畀民企。過去10年，官方一直希望搞番旺A股個場，始終搞唔掂。
有中國特色的股市牛短熊長，長期熊市，突然爆一下牛市，發一聲就完。之後就係平倉線保衛戰，一定要頂住，否則一跌入斬倉潮股市崩潰。跌得耐突然急炒一輪，老細又立即倉底股都拎去抵押，然後又係平倉線保衛戰，不斷輪迴。A股重有冇得救？內地近日熱烈討論由央行出手買起A股，由於有日本央行前例，或認為只要央行一出手A股就有救。但只要明白中國模式，就明白看待此事不能太認真。
相對地美國今輪牛市玩咗10年，其一大助力來自回購。美股回購威力有幾勁？據研究機構TrimTabs數據，2018年美股回購金額已超過1萬億美元；而據瑞信數據，自2010年以來，美股總市值的上漲，有24.4%來自股票回購。所以去年證監會主席劉士余提出關於《中華人民共和國公司法修正案（草案）》說明，想執正A股回購的程序。今年1月11日，上交所發佈《上市公司回購股份實施細則》。
推動股份回購非易事
官方想學美國推動股份回購，上市公司老細聞到味，知道需要表現政治正確。例如歐菲科技公告6個月內回購5,000萬－20億元股份，但該公司去年第三季報賬面資金只有6.7億，而且負債率73.5%；華業資本宣佈一年內回購5－10億元股份，結果上個月話有應收賬被騙終止回購。執正公司法推動回購，係希望上市公司老細自己撳荷包託價；討論央行出手買起A股，仍然係希望共產黨包底。將兩件事放埋一齊睇便明白，後者所謂的討論，不需要太認真。
美股回購的動力，來自美元萬劍歸宗及減稅方案，A股市場現下欠這兩種水源。更重要的，係上市公司老細心態。美股雖然CEO以回購托股價有利自己分紅，但人哋老細心態始終在營運一間企業。中國除咗少數最大型企業，老細究竟有冇心做，存疑。
在此情況下，大家好似《鹿鼎記》內的周星馳，應酬式叫一聲反清復明都識做，要佢拎錢回購股份，慢慢嚟。A股要有救，只有開放。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.finance.appledaily.com