國泰甩難 太古一身鬆
2019年02月22日
中美貿易談判繼續，《路透社》昨日爆料，指中美正草擬六項諒解備忘錄，涉及強逼技術轉移及數碼盜竊、知識產權、服務業、貨幣、農業以及非關稅貿易壁壘。
睇番六項諒解備忘錄其中一項係貨幣，傳聞美國要求中國唔好再畀人民幣下跌。阿爺唔
會好似1985年日本簽廣場協議咁傻，令貨值大幅炒高，但最後雙方有協議唔好畀人仔再跌機會不低。若然係咁，雖然對中國出口有壓力，但對資產市場卻係好事，人仔未來都可以睇高一線，外資都會更夠膽入中國炒作。
港股受中美正草擬六項諒解備忘錄消息刺激，一度衝高，但晏晝一點幾跟隨內地股市回落，等三點A股收市後，港股再反彈，最後升115點收場，個別股份跟住消息炒作。
貿談入肉 好事快近
大股中以太古A(019) 表現較突出，噚日升1.6%，收報93.85元，彈上一年新高，係少數突破33000點高位時股價嘅藍籌。太古能夠有咁嘅表現，主要係上個升浪股價大落後，太古A歷史高位係2010年創出嘅137元，當時公司幾瓣業務都強，但之後開始踏入反覆期，最近幾年受旗下核心業務之一國泰(293) 不振影響。
傳統上，太古業務係靠地產同航空兩大支柱帶動，再加上其他實業部門。國泰受經營效率下降同期油虧損困擾，股價喺過去三、四年長期低迷，甚至反覆向下，貢獻畀太古盈利大減，所以就算地產部門表現唔錯，太古股價都難以振作，喺舊年年頭股市牛氣沖天，太古股價仍然遠離歷史高位。
太古股價喺舊年下半年開始好轉，終於能夠造出一年高位，主要係國泰衰足幾年後，開始有見底跡象。國泰成績表見紅後，開始推行瘦身計劃，同時高位買落嘅期油合約逐漸期滿，最新情況顯示衰日子開始過去。
國泰日前宣佈，預期舊年純利約23億元，扭轉2017年虧損12.59億元嘅局面。客運成績主要由於能維持客運率同提升收益率。貨運業務亦見表現強勁，貨運量、貨運率同收益率都有增加。至於為人詬病嘅燃油對沖，國泰早年所定合約都喺今年到期。截至舊年上半年，公司對沖虧損跌至6.53億元，按年減82.6%。
如果以預期賺23億元計，國泰目前市盈率約22倍，由於國泰主要對手香港航空近期陷入財務困擾，有利公司競爭，估計業績仲有改善空間。國泰唔再成為包袱，太古自然一身輕，所以股價就彈上。如果將國泰同太古比，太古資產淨值有168元，股息有2.2厘，應該比國泰穩健。
人仔走強 內航受惠
睇番大市喺26000點時，太古跌到去75、6元，現時反彈近三成，顯示股價正在轉強。太古本身最吸引係地產業務，但主要用作收租投資，利錢深嘅起樓業務幾乎停頓，所以公司比較靜態，唔會大幅爆上，股價近日都係升兩日、跌一日，比較啱愛穩陣人士買入，但就不宜高追，如果有貨可以先用作收息。
國泰發盈喜後，股價收市升逾4%，報13.58元。其實係受中美草擬貿易協議綱要消息推動，人民幣在岸同離岸價雙雙升穿6.7關口，內航股表現更突出，因為佢地買飛機欠美元債，國航(753) 升7.7%，報8.5元；南方航空(1055) 報6.09元，升6.8%；東方航空(670) 亦揚4%，報5.17元。
陸羽仁
金融High Tea 舊文
來源 source: http://hdfin.stheadline.com