魚樂無窮 - 唐牛 2019年3月21日
魚樂無窮：有懷疑 持現金 - 唐牛
投資者買賣股票，永遠都要記住一句話︰有懷疑，持現金！資料圖片 適中字型 較大字型
近期披露易最旺場的通告，當然係各大上市公司的業績，但心水清的朋友，不難發現有部份公司未能如期派成績表，個案明顯比過往為多。好似新高教（2001）咁，周一晚宣佈因某些董事因其他事務不能按照原定日期出席董事會會議，故原定今日舉行的會議，要延遲至下星期五，股價隨即插一棍；最新鮮滾熱辣的慕容控股（1575），稱需額外時間落實業績，股價更是喪插五成。
相信大家都諗到同一個問題︰有乜其他事務重要得過自己公司放榜？定係有其他內情？任你有幾聰明都未必解構到，但從操盤角度出發，買股票最怕遇到這些情況。兩年前我買過一隻細價股，目標博佢賣盤食大茶飯，點知公司突然宣佈延遲公佈業績，我就嗱嗱聲沽貨走人。結果係點？間公司冇幾耐就拉閘，去到今時今日都未復牌，問你怕未？
早前曾推介的大灣區概念股泰邦（2203），也遇上同一情況，有董事未能出席原於昨日舉行的董事會會議，要改期至星期五，雖然股價好彩地未見大跌（相信係貨源太歸邊關係），但建議戰友們先行避一避，到成績表順利公佈再入場都未遲。永遠都要記住一句話︰有懷疑，持現金！
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://hk.finance.appledaily.com