笑到最後 - 高明 2019年3月4日
笑到最後：搵食艱難「堅料」難求 - 高明
網上推介周不時有「堅料」，呢啲堅料原因背後多數係玄之又玄，總之「我知得太清楚，唔方便講咁白」。 聯網圖片 適中字型 較大字型
上星期一名網民在網上推介一隻股票，推介原因卻聲稱「唔方便講太多」，翌日立即發盈警，股價連跌5日，當中嘅人物角色設定、對白、股價走勢、後續跟進，就如本欄月初喺文章「升市三大障礙」中預言一樣，當有人聲稱有堅料後，升市出現障礙，又被本欄言中。
大家可能會問，高明你又唔識嗰啲網民，點解佢做咩你都成功預測到佢哋一言一行？背後原因，就係高明冇睇股市，反而睇參與者嘅反應。股價走勢大部份時間都難以捉摸，炒股致富嘅人一般都只係掌握到部份走勢而成功。不過，參與者嘅反應則係千篇一律，只要你炒股票炒多幾年，交多幾次學費，開始同人傾股票，好快就會收到「堅料」，呢啲堅料原因背後多數係玄之又玄，總之「我知得太清楚，唔方便講咁白」。
近十年流行嘅原因叫「阿爺入市」，每次升升跌跌，總有人話都同「阿爺」有關。根據過往經驗，升市從來冇人會話阿爺入市，只有喺跌市反彈時，先會有阿爺出現，之後反而會越跌越多。
以往資訊唔流通，好大程度就要靠親身經歷，例如銀行股票機前，見到啲散戶開始興奮推介好嘢，就知有料到。今時今日資訊分散，買股票就都係網上交易，人心難測。但因為有社交媒體，開個專頁就自覺係意見領袖KOL，當呢啲人好興奮咁發放堅料時，即使面對股市千變萬化，但啲人反應次次一樣，你大概都會知未來發生咩事。
網民一推即中盈警，製造短線急速下跌超過兩成嘅造淡訊號，唔理佢咩動機，今時今日搵食艱難，有咁嘅機遇真係難能可貴，希望相關人士復出後可以多為股票市場作出貢獻。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://hk.finance.appledaily.com