金手指 - 孫柏文 2019年3月5日
金手指 ：冇協議 難大力炒上 - 孫柏文
中美貿戰喺未有協議內容前，相信好多人，包括大戶大鱷，都唔敢大力盲炒上。 資料圖片 適中字型 較大字型
孫柏文今日想強調嘅，唔係話中美貿戰冇協議，個市唔會升。只不過我相信好多人，包括大戶大鱷，喺未有協議內容前，唔敢大力盲炒上。
上周不斷傳出大陸企業相繼炒人，仲要唔似以前，係啲低科技嘢，而係啲高科技公司都話裁員。如果我係美帝，仲唔趁你病，攞你命？
咁如果真係有協議，即係大陸接受一份有機會係令經濟系統翻天覆地嘅協議。如果係咁，有啲咩會被反枱呢？
之前我多次講過大陸嘅鋁業，特別係宏橋（1378）。市場就話會影響啲車股等。不過，如果係「明治維新」嗰隻，會唔會Amazon入去打阿里，fb隻揪騰訊（700）。唔好講邊個贏，淨係又要燒錢咁點？恒指到時會乜樣？
仲要市場𠵱家都仲係信大陸買多啲大豆、飛機，就擺得平。一旦有超預期嘅變化，你啲資金企咩位？有得升不過唔係牛市。即係你揀嘅股票，一定要流通性高。一旦音樂停止，你都走得甩，搵到位坐。
最後，噚日見到數據，話大陸只改革開放後，勞動人口第一次喺2018年按年下跌。而人口數據話（除非大量移民湧入大陸），勞動人口喺未來亦會不斷下跌。即係點解？日本勞動人口喺1990年見頂。之後點？你唔知走去問嚇長輩以前日本有幾威。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.finance.appledaily.com