操盤手札記 - 割柑人 2019年4月2日
操盤手劄記：欲走還留撐股價 - 割柑人
四叔上月公告喺5月28日股東大會後退任恒地主席，但留任董事，仍有話事權。資料圖片 適中字型 較大字型
美國債息連續倒掛5日後回復正常，未達連續倒掛10日嘅確認衰退門檻，股市連隨反彈。不過，衰退係咪虛驚，本周美國多項經濟數據會有更多啟示。周一，中港股市借力中國製造業PMI重越盛衰線，滬股衝高2.6%，港股衝高1.8%。
本周仲要留意英國脫歐表決、中美貿易談判，前者進入第二階段指示性投票，後者進入第九輪高級別磋商。講到脫歐，有網民戲言「Brexiting」應被納入《牛津英語詞典》，意指「Telling everyone at the party that you are leaving, but actually staying.」
欲走還留，又何止英國。「四叔」李兆基上月20日公告喺5月28日股東大會後退任恒地（012）主席，但留任董事，仍有話事權。
四叔交棒畀兩個仔做聯席主席，自己做「太上皇」，仲有「太傅」副主席林高演幫手睇住，證券界對「繼承者們」都放心，花旗、滙豐、星展更調高目標價。恒地股價上周升破2017年歷史高位49.791元（經除權調整），本周繼續破頂，現價50.05元。
本港房屋供應不足，政府勢將加快農地發展同市區重建。根據各大地產商業績報告，截至2018年底，擁有農地三甲係恒地、新地（016）、新世界（017），分別擁有4,560萬平方呎、3,100萬平方呎、1,700萬平方呎。恒地除咗係「農地王」，亦係市區舊樓重建主要發展商。
恒地現金流穩健，持有唔少收租物業，仲持有41.53%煤氣（003）呢隻現金牛，有助集團過去幾年派息年年增加。恒地上月放榜，多賺1.1%，派末期息每股1.3元，按年增加5.7%，另十送一紅股。該股基本條件唔差，具中線投資價值，逢低吸納之選。
割柑人
本欄逢周二刊出
操盤手札記 - 割柑人 舊文
來源 source: http://hk.finance.appledaily.com