金手指 - 孫柏文 2019年4月2日
金手指：友誼比PMI更堅 - 孫柏文
噚日大陸PMI報佳音，大陸股市炒到㷫烚烚。如果PMI指數話靚，咁係咪要收水令股市降溫呢？資料圖片 適中字型 較大字型
早前2月19日，孫柏文喺本欄話過，梁心欣當時係咁叫我買映客（3700）。篇文出街嗰朝開市，隻嘢就賣2.12元。我仲話過隻嘢我唔熟，你跟純粹買緊我同心欣嘅友誼有幾堅。究竟佢係咪搵我接火棒。
當然，雖話隻嘢係心欣姐搵出來，不過當有本欄嘅「祝福」，就喺呢幾個禮拜最低見過1.78元。當時，我諗一係本欄一向作風「跌嚇畀大家上車」又靈驗，一係我同梁心欣嘅友誼，原來係咁。
點知，到噚日收市，報2.31元。如果當時你冇懷疑我哋嘅友誼而買咗坐到𠵱家，我噚日問心欣姐，佢話2.5元應該會升穿，所以識執生啦。而如果你當時冇跟，或者老早放咗，就唔好問我啦。因為唔信我哋嘅友誼有幾堅，再問做乜？希望好快我可以唱番句：「人生有個真正朋友的確好極！」
最後，噚日大陸PMI係喺好多個月來第一次話啲採購經理睇好，所以令大陸同我哋大灣區股市炒到㷫烚烚。反射式反應我就唔多講。不過大陸數據好多時篤出來，大家用法唔係攞來做量度現實，而係攞來估篤呢條數出來嘅偉大中央下一步想點。
咁直線推斷，之前數月印咗咁多錢出來，大陸資產市場特別係股市又炒到過度亢奮。咁PMI呢個話反應實體經濟嘅指數話靚，又係咪收水之時令股市降溫呢？真係一個迷思。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.finance.appledaily.com