操盤手札記 - 割柑人 2019年5月7日
馬上成為壹會員
會員註冊/登入
【操盤手劄記】血色星期一部署 - 割柑人
平保宣佈回購A股，如果A股升，H股亦會追價。 資料圖片 適中字型 較大字型
極限施壓！美國總統特朗普周日突然發Twitter，周五起對中國貨品關稅加碼。此前吹曬風話今輪貿談係最後一輪，最快周五達成協議，臨門施壓，談判慣技。
不過，就算中國受壓讓步，最終達成協議，咪以為中美從此休戰，咪咁天真。中美衝突嘅核心，係爭奪經濟霸權！貝萊德（BlackRock）就指出，中美緊張局勢已擴大到技術、意識形態、政治、軍事上，並警告投資者，唔好將貿易休戰同整體關係緩和混為一談。
今日，受累貿談生變，股滙刮起風暴。風眼中嘅A股，儘管阿爺宣佈定向降準救市，仍瀉5.6%，收2906；港股亦瀉2.9%，收29209。恒指開市以下跌裂口補回上升裂口，出現島形見頂形態，其後更跌穿50天線，後市除非重上50天線及補回下跌裂口，否則走勢轉弱。
血色星期一之後，市況未明，本周最好𥄫實特朗普Twitter，重新部署策略。操盤手第一黃金規條係絕對唔好喺市場最恐慌時入市，因市場恐慌時，無論追沽或博反彈都係危險行為。較穩妥嘅做法係等待較明確嘅轉勢訊號先至入市，寧可錯過，唔好做錯。
不過，跌市亦可睇定有潛力嘅股份，謀定後動。近日市場焦點，除咗貿談，最hit嘅係回購。繼渣打（2888）上周二趁公佈季績時宣佈回購，並於上周四出手後；滙控（005）上周五亦趁公佈季績時宣佈年中有回購決定。講到回購，唔好忘記平保（2318）。
平保早於3月12日公佈全年業績時已宣佈回購A股，並於上周一股東大會通過，由於上周A股休市，意味最快本周出手。平保回購A股嘅上限價係101.24元人民幣，按平保A股現價81.2元人民幣計，仍有25%水位。雖然回購只限A股，但A股升，H股亦會追價。
割柑人
本欄逢周二刊出
操盤手札記 - 割柑人 舊文
來源 source: http://hk.finance.appledaily.com