大棋局 - Mr. Tregunter 2019年5月7日
馬上成為壹會員
會員註冊/登入
【大棋局】貿易戰大膽車終段 - Mr. Tregunter
中美貿易戰進入尾聲，最後出現雙方都企硬的機會較低，相信美中雙方最終都會以協議成功出嚟攞彩。 資料圖片 適中字型 較大字型
兩個人揸車迎面對撼，邊個先扭軚便輸，為博弈論中一個常見的模型。特朗普已經唔止一次，在談判最後關頭反覆，作為一種施壓手段。美中貿易談判代表原訂本周三於華盛頓會談，為此輪談判最終回，市場預期星期五就會有好消息出爐。但剛過去的星期日，特朗普表示要將2,000億（美元，下同）中國進口產品的關稅稅率，由10%升到25%，而且將來會對另外3,250億的中國商品徵收25%關稅。
當只有兩人博弈，邏輯上有4種可能，一係A；一係B；一係亦A亦B；一係非A非B。以大膽車對撼為例，就係A先扭軚；B先扭軚；AB一齊扭軚；AB都唔扭軚。此模型帶出三個訊息，合作大家冇事，唔合作一齊輸，而先扭軚者先輸。英文稱為The game of chicken，chicken在英文口語中有懦夫之意，所以用廣東話意譯也可叫鵪鶉遊戲。
商場又好官場又好，反覆十分常見。越大嘅deal越容易反覆，因為反覆係用嚟摸底價。越貴重之物，其價值越難釐訂，端視乎出價者最後意願。這類交易唔同喺超級市場，不會明碼實價。買賣雙方必然會磨爛蓆去試探對方，賣方要試買方最終願意畀乜嘢價，買方要試賣方最終肯減幾多價。因此越接近尾聲，越多反覆，乃常態。
擦槍走火機會很低
據報道，中美貿易戰現時有四點爭持不下，其一，美國要保留實施關稅之權力，作為審核中國有冇履行承諾之手段。若日後美方認為中方冇兌現承諾，可重新單向徵關稅。另一種做法，係保留部份關稅，日後中方履行承諾先再減。其二，要中國批准入口現時被中國視為不安全的農產品。其三，要中國開放雲端市場。其四，美國藥廠的新藥保護期可以幾長。
中美貿易戰進入尾聲，雙方要鍊最後一口價。特朗普揚言加關稅，即係要中國畀到價；中國放風或取消唔傾，即係要美國減口價。最後階段，雙方都兇對方先扭軚否則全球慘。最後出現雙方都企硬的機會較低，相信美中雙方最終都會以協議成功出嚟攞彩，擦槍走火機會有，但很低。
最後一點要留意，係關稅點處理。過去提及大宗商品超級周期及康德拉季耶夫周期大機會進入末段，商品會熊市橫行十年。關稅會令物價提高，其實就係托價。赤字嚴重之國家係無法還本，唯一手段係靠通脹蠶食貨幣購買力。用列寧之講法，就係政府靜靜雞沒收平民財富之手段，而且絕大部份平民唔會覺。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.finance.appledaily.com