Can Bank - 散子 2019年5月7日
馬上成為壹會員
會員註冊/登入
【Can Bank】你無權保持緘默 - 散子
對於被調查或者協助調查人士，證監會更常用嘅係發出會面通知，但被邀者基本上無得拒絕。 資料圖片 適中字型 較大字型
近期大台劇《鐵探》熱播，筆者唔係大台FANS，所以都無睇過，但警匪片呢類題材，令筆者諗起一個場面，就係警察上門拉人，仲會講一句「你有權保持緘默，但你所講嘅嘢有可能會成為呈堂證供」。
作為執法部門之一嘅證監會，雖然都有權上門突擊搜查，但對於被調查或者協助調查人士，證監會更常用嘅係發出會面通知，首先叫得做通知，字面上就見得出係要求，基本上無得拒絕，除非有合理解釋，如果唔係就係刑事罪，有機會因唔應約而要罰錢兼坐監。
更加重要嘅係，證監會執法人士喺會面嘅時候，係唔會同你講你有權保持緘默，並唔係佢唔記得，而係因為你無權保持緘默，佢問你就要答，不過好嘅係，可以傾傾嚇隨時返屋企，約過第二日再答都得嘅。
亦都由於佢問你就要答，所以呢啲會面答問，隨時有機會由協助調查人士變咗做被調查人士，亦由於講嘅嘢有機會成為將自己入罪嘅證供，所以法例上亦會有條例保護返嘅，雖然唔係自動擁有，但亦有避免所謂自我入罪嘅權利，講到底，有麻煩嘅時候，最好都係搵個律師幫手。
散子
http://fb.com/ 散子-257101397966975
Can Bank - 散子 舊文
來源 source: http://hk.finance.appledaily.com