操盤手札記 - 割柑人 2019年6月11日
【操盤手劄記】六月危情仍未過 - 割柑人
作為半隻地產股嘅港鐵，料會受惠於美國減息。 資料圖片 適中字型 較大字型
喺中美冷戰激化之際，上周侵侵訪英、大大訪俄，各自拉攏盟友幫拖；另外，中美財金大佬喺G20財長會見面，被視為談判前哨戰。市場憧憬月尾G20峯會再有「習特會」，好似半年前G20「習特會」咁傾掂停火。不過，現時嚟睇，埋枱都會反枱。
侵侵訪英，似乎仍未說服英國封殺華為；大大訪俄，則獲普京幫口鬧美國封殺華為。不過，中俄真係有bromance？俄羅斯視中亞為其地盤，又係中亞同非洲嘅主要武器供應商，但中國藉一帶一路踩入嚟爭食，點會真心幫中國撼美國？國際政治講嘅係利益唔係道義！
中美貿易戰已打殘兩國經濟，甚至全球攬炒，現時環球趨勢，就係鬥快放水！上周五，美國就業數據走樣，市場即炒減息，美滙指數急回，美債孳息急跌，美股急升。周一，港股承接升勢，飆2.3%。不過，上升動力主要嚟自挾淡冚倉買盤，難以持久。
利率期貨顯示，聯儲局下半年有機會減息兩至三次，7月尾開始減息機會超過八成，9月中開始更超過九成。若聯儲局出手減息，變相逼使投資者由債市轉向股市，雖然對股市起到提振作用，但亦同時反映經濟唔掂嘅事實，提振作用短暫。股市能否真正轉勢，要睇中美貿易戰能否和解。特朗普話，G20峯會後先決定係咪對餘下中國貨加徵關稅。一旦加徵，通脹上行疊加經濟下行，將演變成滯脹，令聯儲局再難減息，更不利股市。特朗普明年中先打總統選戰，可以拖到今年9月尾先和談。
Anyway，美國行將減息，香港息口睇美國頭，減息有利地產股，作為半隻地產股嘅港鐵（066）亦受惠。瑞銀就指，港鐵資產同股價對息口敏感，尤其收租物業嘅資本化率（Cap Rate）回落，推升相關物業資產價格嘅估值。港鐵屬中長線之選，不妨留意。
割柑人
本欄逢周二刊出
操盤手札記 - 割柑人 舊文
來源 source: http://hk.finance.appledaily.com