大棋局 - Mr. Tregunter 2019年6月11日
【大棋局】聯儲局在害怕甚麼 - Mr. Tregunter
如果美國因貿易戰而提前經濟衰退，下任接手的聯儲局主席會非常頭痕。 資料圖片 適中字型 較大字型
聯儲局上星期在芝加哥舉行溝通會議，主席鮑威爾話會採取適當行動去維持經濟擴張，外間解讀為就快要減息。其後《華爾街日報》頭條更指，聯儲局開始討論是否最快在6月18-19日FOMC會議上決定減息。芝加哥會議討論的問題，核心只有一個，就係有效利率下限（Effective Lower Bound）。
在理解芝加哥會議討論的問題前，先簡單解說一個重要概念。往時央行係講零利率下限（Zero lower bound），因為凱因斯學派認為，當央行將利率減到接近0時，由於接近冇利息，央行再搞乜貨幣政策都影響唔到市場買國債。所以央行要避免貨幣政策搞到接近零利率下限，否則會失去控場權力。
但2008年金融海嘯後，全球央行嘅貨幣政策工具改良咗。其中QE可以令市場在接近零利率時繼續追買國債，因為QE即係政府包底，所以冇利息，但價會高，就照樣大把人買國債。其後更有如歐洲及日本實行負利率，因此現時央行唔再講零利率下限，而改講有限利率下限，就係零利率唔再係下限，可以低過零。咁可以低過零幾多？唔知，所以用一個虛無之詞「有效下限」。
戲肉在2020年之後
央行決定貨幣政策所參考的指標，其中一個為菲利浦曲線。用一句話概括，就係通脹高失業率低，通脹低失業率高。但美國正面對菲利浦曲線平坦化問題，通脹率唔高，失業率又低。如果按菲利浦曲線，原本以為壓低失業率通脹就會起頭，但美國通脹升唔起。通脹升唔起造成央行兩大困擾，其一，由於有效利率下限問題，利率太低，經濟一衰退，央行以減息刺激經濟的空間非常有限，即冇子彈。其二，無錨貨幣系統必定要長期推通脹去蠶食貨幣購買力，否則赤字嚴重國家會爆，通脹即綁在驢仔頭上的蘿蔔，你要追但永遠食唔到。
科網股爆煲前的1999年，聯儲局已在討論菲利浦曲線平坦化問題，同現時頗相像，但當時聯邦基金利率衰衰地都有5.2%。如果一次減息0.25%，要減20次先見底，觸及零利率下限。但現時聯邦基金利率係2.25-2.5%，減10次已經企咗喺到。而縮表剛剛先至停，負利率確切的問題亦未肯定。如果因貿易戰美國提前經濟衰退，下任接手的聯儲局主席會非常頭痕。
再次強調，中國如果要反枱，只會在美國經濟開始轉弱之後，因此中美掰面，時辰未到。個人估計貿易戰即將落幕，但2020年係一個重要年份，戲肉會在2020年之後。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.finance.appledaily.com