智取大市 - 晉佳 2019年7月17日
【智取大市】買港股要放棄廢老 - 晉佳
除「廢老股」之外，港股其他藍籌股走勢不俗，buy and hold係最佳模式。 資料圖片 適中字型 較大字型
美股破頂固然非常強勢，但恒指跑輸某程度係一批「廢老股」滙控（005）、中移動（941）、內銀拖累，純粹指數比重問題，如果睇港股目前狀態，不如望嚇隻港交所（388），雖然話阿里集資額縮水、百威縮沙，但喺消息面偏弱之下，股價其實非常接近高位，低位仲越推越高，長線似乎有機會向上突破。恒指月線圖亦喺高位呈對稱三角形形態，並不差。除「廢老股」之外，其他藍籌股走勢不俗，唔少股份亦學美股呈慢升狀態，形成buy and hold係最佳模式。
主板成交淡靜，得唔夠700億，市場情緒受到貿易談判隨時反口拖累，如此情緒之下仍能呈三角形，一旦風險胃納提升，好大機會破位，目前強勢消費股、高息股、盈喜股、賭股、科創板概念向好，喺上述板塊選擇下，最好有亮麗前景、持續收入盈利增長或持續穩定派息前景先落手。
點解前兩期講樓市講得悲觀？股市就樂觀？其實分析緊前段唔同時間差。當資產價格過高令平錢無從獲得回報，資產價格自然要進入下跌周期，喺轉角市前，樓市升浪仲有一兩年貨仔不奇，但喺SSD制度下，代表今時今日買樓風險已高。對比股市，進出容易，一年升市都乜都夠玩了，但記住要避開「廢老股」。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com