【大茶飯】迪士尼最強戲碼在年底（青冰）
話說青冰最近一年玩得最多的玩具，是砌Lego積木，當然是拜大老細所賜，即係小女，經常被指令要砌呢樣嗰樣，由一盒細嘅開始，愈買愈多，現在老細已經有一張淘返嚟的專用砌積木檯添，未來幾星期仲要準備買一盒新嘅，就係冰雪奇緣的。
近日好友相繼進軍美股，近期買
的一隻股份就是迪士尼，話獅子王好收得喎，上映了幾星期，全球已錄得逾5億美元票房，雖然青冰提唔起興趣去睇，但都被提醒了，如果話呢套獅子王得，咁11月上嗰套冰雪奇緣續集，相信會更勁，第一集共錄得12億美元票房，那首洗腦的主題曲相信大家都耳熟能詳，Elsa的魔力唔單止係套戲，而是周邊的產品，如果戰友家中有小女孩，一定明白，青冰沒深究過邊樣賺錢啲，但對迪士尼來說，都係一樣啫。
冰雪奇緣可能是被逼要睇，但自己還是很期待另一套迪士尼電影，星球大戰9，迪士尼為免自己人打自己人，11月22日上冰雪奇緣，食感恩節檔期，星戰就安排了12月20日，聖誕節前上映，換言之，兩套超強戲碼，相差只距一個月，若說獅子王能刺激迪士尼股價，咁年尾的重頭戲更值得憧憬。
講完戲又講返積木，迪士尼的周邊產品，其一就是授權Lego出積木，青冰亦課金唔少，而上面兩套大片，亦是積木界的主角，尤其是星戰，如果你去門市望嚇，星戰的產品實在超多，尤其是大小飛船，價錢亦都唔平，最適合有能力課金的kidult，所以今年有新戲上映，應對Lego銷售有莫大幫助，可惜這間丹麥公司是沒有上市的。
而在香港上市的凱知樂(2122)，是Lego的中港代理商，2017年以1.55元上市，不過條數真係不敢恭維了，上年度蝕1億元，股價上市後累跌80%。雖然門市店經常好多人，但大部分家長都係帶小朋友來玩，真正幫襯的較少，加上網購積木的渠道很多，有些更稱會從丹麥或外地直接入貨，價錢仲平過公價，真係生意難做啊。
所以如覺得Elsa同星戰會大收，還是正正經經買迪士尼好過啦。
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com